Aldın xabar bergenimizdey, Ájiniyaz atındaǵı Nókis mámleketlik pedagogikalıq institutı rektorı Bayrambay Otemuratov fakultetler kesiminde pitkeriwshi kurs studentleri menen ushırasıw ótkermekte.

Búgin, 14-fevral kúni instituttıń Mektepke shekemgi tálim fakultetinde ótkerilgen ushırasıwda bilimlendiriw tarawı hám xalıq xojalıǵınıń basqa da salalarına jetik kadrlar tayarlaw máseleleri sóz boldı.

Fakultette bakalavriattıń mektepke shekemgi bilimlendiriw hám arnawlı pedagogika (logopediya) tálim baǵdarları boyınsha 1 000 ǵa shamalas student-jaslar bilim almaqta. Fakultette oqıw qaraqalpaq, ózbek, qazaq, rus hám inglis tillerinde alıp barıladı.

Ashıq sáwbetlesiw tárizinde ótken ushırasıwda institut rektorı pitkeriwshi kurs studentleriniń bántligin támiyinlew, mektepke shekemgi bilimlendiriw shólkemleriniń tárbiyashı-pedagog hám defektolog-logoped qánigeleri ushın qoyılıp atırǵan talaplar, bilimlendiriwdiń sapasın arttırıw, oqıw hám ámeliyat birligin támiyinlew maqsetinde jolǵa qoyılǵan «4+2» sistemasın jetilistiriw, tarawǵa sırt el tájiriybesin hám innovaciyalıq texnologiyalardı engiziw boyınsha ámelge asırılıp atırǵan jumıslar haqqında maǵlıwmatlar berdi.

Kópshiliktiń xabarı bar, instituttıń Mektepke shekemgi tálim fakultetinde klasster usılında kadrlar tayarlawǵa ayrıqsha dıqqat qaratılıp, respublikamızda birinshilerden bolıp institut qasınan mektepke shekemgi bilimlendiriw shólkemi qurılmaqta. Bunıń tiykarǵı abzallıǵı, bul jerde mektepke shekemgi tálim baǵdarınıń studentleri, magistrant hám doktorantları hár qıylı metodikalardı qollanıw arqalı balalarda kreativ oylaw, jámiyetshilik penen qarım-qatnas sıyaqlı kónlikpelerdi payda etiwge tiykar jaratıladı.

Tarawǵa tájiriybeli hám zamanagóy bilimge iye, dúnyada tán alınǵan bilimlendiriw standartları tiykarında bilim alǵan kadrlardı jetkerip beriw maqsetinde 2022-2023-oqıw jılınan baslap Malayziyanıń Lincoln University College oqıw ornı menen mektepke shekemgi bilimlendiriw baǵdarı boyınsha institut tariyxında birinshi márte qospa tálim baǵdarlaması jolǵa qoyıldı.

Bunday jumıslardıń barlıǵı tarawda zamanagóy talaplarǵa juwap beretuǵın hám básekige shıdamlı qánigelerdi tayarlap shıǵarıwǵa xızmet etedi.

Ushırasıwda student-jaslar kún tártibindegi máseleler boyınsha ózlerin qızıqtırǵan sorawlarǵa juwaplar aldı hám pikir-usınısların bildirdi.

NMPI baspasóz xızmeti.