Ájiniyaz atındaǵı Nókis mámleketlik pedagogikalıq institutı kásiplik awqamı komiteti tárepinen 2022-jılda ámelge asırılǵan jumıslarınıń juwmaqları hám 2023-jılǵa belgilengen wazıypalarǵa arnalǵan keńeytilgen jıynalısı bolıp ótti.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Jıynalısqa Ózbekstan bilimlendiriw hám ilim xızmetkerleri kásiplik awqamı respublikalıq keńesiniń Qaraqalpaqstan Respublikası boyınsha juwaplı shólkemlestiriwshisi R.Abduraxmanov, Ózbekstan kásiplik awqamları federaciyasınıń miynet inspektorı, yurist P.Tursınov, institut fakultetleriniń dekanları hám olardıń orınbasarları, bólimler hám kafedralardıń baslıqları, professor-oqıtıwshılar jáne studentler qatnastı.

Keńeytilgen jıynalıs kún tártibine muwapıq, dáslep institut kásiplik awqamı komiteti tárepinen 2022-jılda ámelge asırılǵan jumıslardıń juwmaqları hám 2023-jılǵa belgilengen wazıypalar boyınsha maǵlıwmat berildi.

2022-jılı kásiplik awqamı komiteti tiykarǵı jumısların institut rektoratı menen dúzilgen jámáátlik shártnama bántleri sheńberinde alıp bardı. Jámáátlik shártnama tiykarında xızmetkerlerge qosımsha xoshametlew pulları, materiallıq járdemler berildi. Atap aytqanda, ótken jılı 239 xızmetkerge 71 million 850 mıń sumlıq materiallıq járdem, sonday-aq, yubiley sáneleri múnásibeti menen jıl dawamında 4 xızmetkerge 2 million 178 mıń sumlıq bahalı sawǵalar berildi. Sonıń menen birge, ǵalabalıq-mádeniy, qayır-saqawat ilajları, bayram sáneleri, professor-oqıtıwshılar, studentlerdiń bos waqıtlarında elimizdiń tariyxıy qalaları boylap sayaxatlarǵa alıp shıǵıw, jumıs islewshiler hám olardıń perzentlerine dem alıw jáne sawallandırıw oraylarına jollamalar beriw sıyaqlı ilajlarǵa da qarjılar ajıratıldı.

Institut xızmetkerleri ushın jeterli miynet sharayatların jaratıp beriwdi qadaǵalaw kásiplik awqamı komiteti jumıslarınıń baslı baǵdarlarınıń biri bolıp, bunda jumıs islewshilerge miynet etiw, oqıtıw, studentlerge bilim alıw sharayatın jaratıwda Ózbekstan Respublikası «Miynetti qorǵaw haqqında»ǵı nızamı hám huqıqıy-normativlik hújjetler talapların orınlaw baǵdarında da unamlı jumıslar ámelge asırıldı.

Jıynalıs dawamında Ózbekstan Respublikasınıń jańa redakciyadaǵı Miynet kodeksi, onıń mazmunı hám áhmiyeti boyınsha qatnasıwshılarǵa tolıq maǵlıwmatlar berildi.

Ilajda kásiplik awqamı komiteti tárepinen ótken jıl dawamında islengen jumıslardın nátiyjeleri joqarı bahalandı hám 2023-jılda ámelge asırılatuǵın jumıslar dodalanıp, aldaǵı wazıypalar belgilep alındı.

Ilaj sońında kásiplik awqamı komiteti jumıslarında belsendilik kórsetip kiyatırǵan fakultet dekanları, professor-oqıtıwshılar hám xızmetkerlerge estelik sawǵaları tapsırıldı.

NMPI baspasóz xızmeti.