Qaraqalpaqstan Respublikası Joqarǵı Keńesiniń Baslıǵı Amanbay Orınbaev búgin, 15-fevral kúni respublikamızdaǵı joqarı oqıw orınlarınıń belsendi student-jasları menen ushırastı.

Ashıq sáwbetlesiw hám óz ara pikirlesiw formatında ótken ushırasıwda respublikamız basshısı sońǵı jıllarda Prezidentimizdiń joqarı bilimlendiriw tarawında ámelge asırıp atırǵan reformaları nátiyjesinde Qaraqalpaqstan Respublikasında joqarı oqıw orınlarınıń sanı 10 ǵa jetip, sonıń ishinde, Qaraqalpaqstan medicina institutı, Qaraqalpaqstan awıl xojalıǵı hám agrotexnologiyalar institutı sıpatında qayta shólkemlestirilgenligi, ulıwma joqarı oqıw orınlarınıń sanı 2,5 esege kóbeyip, jaslardı joqarı bilimlendiriwge qamtıp alıw dárejesi aldınǵı 9 procentten 36 procentke kóterilgenligin atap ótti.

Tarawda ámelge asırılıp atırǵan keń kólemli reformalardıń eń shetki aymaqlarǵa shekem jetip barıwın támiyinlew maqsetinde Berdaq atındaǵı Qaraqalpaq mámleketlik universitetiniń Shımbay fakulteti, Ájiniyaz atındaǵı Nókis mámleketlik pedagogikalıq institutınıń Ellikqala pedagogika fakulteti, Tashkent mámleketlik ekonomika universitetiniń Tórtkúl filialları shólkemlestirildi.

Jaslardıń oqıp bilim alıwı, ilimiy-izertlew jumısları menen shuǵıllanıwı, kásip-óner úyreniwine qolaylıq hám imkaniyatlar jaratıw maqsetinde 2022-2023-oqıw jılında tólemli kontrakt muǵdarları kóbeytilmedi hám eselengen kontrakt muǵdarı 10 procentke arzanlastırıldı.

Sonıń menen birge, Prezidentimizdiń 2022-jıl 7-marttaǵı «Shańaraq hám hayal-qızlardı sistemalı qollap-quwatlawǵa baylanıslı jumıslardı bunnan bılay da jedellestiriw ilajları haqqında»ǵı pármanı tiykarında mámleketlik joqarı oqıw orınlarınıń magistratura basqıshında oqıp atırǵan barlıq hayal-qızlardıń kontrakt tólemleri qaytarıw shártisiz qaplap beriliwi belgilendi.

«Qaraqalpaqstan Respublikasında isbilermenlik, innovaciyalıq texnologiyalar hám infrastrukturalardı jedel pátlerde rawajlandırıw arqalı xalıqtıń abadanlıǵın arttırıwdıń qosımsha ilajları haqqında»ǵı prezident pármanına muwapıq, 2022-2023-oqıw jılında qaraqalpaqstanlı 500 jas studentler qatarına qabıl etilgen bolsa, kelesi oqıw jıllarında 6 500 jastıń wálayatlardaǵı joqarı oqıw orınlarına ayrıqsha qabıllaw parametrleri tiykarında oqıwǵa qabıl etiliwi belgilep qoyıldı.

Mine, usınday imkaniyat hám sharayatlardan nátiyjeli paydalanıp kiyatırǵan jaslar arasınan xalıqaralıq hám respublikalıq tańlawlar, pán olimpiadaları, sport jarıslarınıń, mámleketlik stipendiyalar tańlawlarınıń jeńimpazları jetilisip shıqpaqta.

Ushırasıwda student-jaslar tárepinen oqıw hám ámeliyattıń óz ara tıǵız baylanısın támiyinlew, jaslardıń innovaciyalıq, startap joybarların qollap-quwatlaw, isbilermenlik penen shuǵıllanıwı ushın qosımsha imkaniyatlar jaratıw, Joqarǵı Keńes Baslıǵınıń stipendiyasın engiziw, rayonlardan qábiletli, bilimge qushtar jaslardı izlep tabıw, olardı ilim-bilimge baǵdarlap, xoshametlep barıw, jazǵı dem alıs dáwirinde belsendi studentler arasında «Sahra Renessansı» lagerlerin shólkemlestiriw, intellektual oyınlar, kitapqumarlıq tańlawları, sport jarısların kóbeytiw, jaslar bántligin támiyinlew máseleleri boyınsha pikir-usınıslar bildirildi.

Bul usınıslardıń barlıǵı Joqarǵı Keńes Baslıǵı tárepinen qadaǵalawǵa alınıp, tiyisli tártipte úyrenip shıǵıw maqsetinde ámeliy jumıslar alıp barılatuǵınlıǵı atap ótildi.

Ushırasıw sońında usı formattaǵı ilajlardı hár bir joqarı oqıw ornı kesiminde ótkeriw boyınsha pikirler bildirilip, aldaǵı wazıypalar belgilep alındı.

Ilajǵa Joqarǵı Keńes Baslıǵınıń orınbasarı R.Saparbaev qatnastı.

NMPI baspasóz xızmeti.