Quyash energiyası qorshaǵan ortalıqtı pataslamaytuǵın, paydalanılıwı jaǵınan hesh qanday biologiyalıq qáwipli bolmaǵan, energiyanıń eń jańa túri bolıp tabıladı. Quyash – tawsılmaytuǵın energiya dáregi bolıp, onnan paydalanıw energetikalıq máselelerdi sheshiwdiń eń ápiwayı hám arzan usılı esaplanadı. Áhmiyetlisi, quyash energiyasınan keń masshtabta paydalanıw planetamızda qáliplesken evolyuciyalıq energetikalıq balanstı buzbaydı.

Búgingi kúnde mámleketimizde xalıq hám isbilermenlik subektleriniń qayta tikleniwshi energiya dáreklerinen keń paydalanıwın mámleket tárepinen qollap-quwatlaw mexanizmlerin engiziw, usı dárekler arqalı elektr hám ıssılıq energiyası menen támiyinlew jáne hákimshilik-turmıslıq imaratlar hám obektlerde energiya resurslarınan nátiyjeli paydalanıw boyınsha bir qatar unamlı jumıslar ámelge asırılmaqta.

Ózbekstan Respublikası Joqarı bilimlendiriw, ilim hám innovaciyalar ministri Ibrohim Abdurahmonov basshılıǵında ótkerilgen májiliste barlıq joqarı oqıw orınlarında alternativ energetikaǵa ótiw máselesi dodalanıp, rektorlarǵa oqıw hám studentler turaq jayları imaratların tolıq quyash energiyası panelleri menen úskenelew tapsırılǵan edi.

Ózbekstan Respublikası Prezidentiniń 2022-jıl 9-sentyabrdegi «Energiyanı únemlewshi texnologiyalardı engiziw hám kishi quwatlılıqqa iye qayta tikleniwshi energiya dáreklerin rawajlandırıw boyınsha qosımsha ilajlar haqqında»ǵı pármanı talapların orınlaw, sonday-aq, qayta tikleniwshi energiya dáreklerinen keń túrde paydalanıwdı mámleket tárepinen qollap-quwatlaw mexanizmlerin turmısqa engiziw maqsetinde Ájiniyaz atındaǵı Nɵkis mámleketlik pedagogikalıq institutınıń 600 orınǵa mɵlsherlengen studentler turaq jayı imaratı ushın respublikalıq tovar shiyki zat óndirislik birjası arqalı «NDKAB TEXAS» juwapkershiligi sheklengen jámiyeti menen 482 million 912 mıń sumǵa shártnama dúzilip, 20 dana ulıwma 4 tonnalıq quyash energiyasınan suw ısıtıw qurılmaları ornatıldı hám iske túsirildi.

Sonday-aq, respublikalıq tovar shiyki zat óndirislik birjası arqalı 1 milliard 200 mıń sumǵa «SUN-HIGHTECH» juwapkershiligi sheklengen jámiyeti menen shártnama dúzilip, institut imaratlarına ornatıw ushın quwatlılıǵı 100 kVt bolǵan 1 komplekt energiya únemlewshi quyash panelleri stanciyası jáne de institut átirapların túngi jaqtılandırıw ushın 100 dana quyash jaqtılandırıw qurılmaları satıp alınıp, búgingi kúnde usı qurılmalardan nátiyjeli paydalanılmaqta.

NMPI baspasóz xızmeti.