Ájiniyaz atındaǵı Nókis mámleketlik pedagogikalıq institutı sport klubı tárepinen student-jaslar arasında mini futbol boyınsha «Rektor kubogi» jarısı shólkemlestirildi.

Jarısqa instituttıń barlıq fakultetleri hám sırtqı bilimlendiriw bóliminen komandalar qatnastı.

Yarım final oyınında Fizika-matematika fakulteti komandasın 2:1 esabında jeńip shıqqan Dene mádeniyatı fakulteti komandası hám yarım finaldıń ekinshi oyınında Tariyx fakulteti komandasına 5:2 esabında hesh qanday imkaniyat qaldırmaǵan sırtqı bilimlendiriw bólimi komandası «Rektor kubogi» hám jeńimpazlıq ushın maydanda ózleriniń sport sheberliklerin kórsetiwge háreket etti.

Final oyınınıń tiykarǵı waqtında 3:3 esabı dizimge alınǵanı sebepli, kubok jeńimpazı «futbol lotoreyası» – penaltiler seriyasında anıqlandı.

Sırtqı bilimlendiriw bólimi dárwazamanınıń sheber háreketleri nátiyjesinde bir top parqı menen jeńimpazlıqqa tiykarǵı favorit esaplanǵan Dene mádeniyatı fakulteti komandası jeńiliske ushıradı.

Solay etip, ózleriniń joqarı sport sheberlikleri hám tayarlıqların kórsetken sırtqı bilimlendiriw bólimi komandası mini futbol boyınsha «Rektor kubogi» jeńimpazı boldı.

3-orın Tariyx fakulteti komandasına nesip etti.

Jarıs juwmaǵında jeńimpaz komandaǵa kubok, sıylı orın iyelerine diplom hám medallar tapsırıldı.

NMPI baspasóz xızmeti.