Aldın xabar bergenimizdey, búgin, 5-aprel kúni Ájiniyaz atındaǵı Nókis mámleketlik pedagogikalıq institutında «Referendum hám jaslar» atamasındaǵı forum shólkemlestirildi.

Ilajda Qaraqalpaqstan Respublikası Joqarǵı Keńesiniń komitet baslıǵı Sh.Ótemisov hám institut rektorı B.Otemuratovlar sózge shıǵıp, jańa redakciyadaǵı Konstituciya Ózbekstan jámiyetshiliginiń evolyuciyalıq rawajlanıwınan kelip shıǵıp atırǵan turmıslıq zárúrlik bolıp, bul mámleket, millet hám xalıq sıpatında keyingi qádemlerimizdi anıqlap alıwımız ushın oǵada áhmiyetli másele, ádil jámiyet qurıw jolındaǵı úlken qádem ekenligin ayrıqsha atap ótti.

Ásirese, onda keleshegimiz iyeleri esaplanǵan jaslardıń oqıp bilim alıwı, kásip-óner úyreniwi, ilimiy-izertlew jumısları menen shuǵıllanıwı – ulıwma aytqanda óz qızıǵıwshıları, umtılısları tiykarında qábiletlerin júzege shıǵarıwı ushın mámleketimiz tárepinen barlıq sharayatlar jaratılatuǵınlıǵı ele de bekkemlenbekte.

Forumda instituttıń bakalavriatura hám magistratura basqıshlarında oqıp atırǵan, hár qıylı respublikalıq hám xalıqaralıq tańlawlarda jeńimpazlıqtı qolǵa kirgizgen, elimizde jaslarǵa jaratılıp atırǵan imkaniyatlardan nátiyjeli paydalanıp, teńleslerine úlgi bolıp kiyatırǵan bir topar jaslar shıǵıp sóyledi.

Ilaj instituttıń talantlı studentleri hám estrada qosıqshılarınıń atqarıwındaǵı koncert baǵdarlaması menen dawam etti.

NMPI baspasóz xızmeti.