Ájiniyaz atındaǵı NMPI Málimleme-resurs orayı oqıw zalında III Respublikalıq kitapqumarlıq hápteligi sheńberinde belgili jazıwshı, ilimpaz, jurnalist sıpatında respublikamız xalqına jaqsı tanıs bolǵan Allanazar Ábdiev penen ushırasıw keshesi bolıp ótti.

Keshege qaraqalpaq tili kafedrasınıń docenti, filologiya ilimleriniń kandidatı A.Orazımbetov, qaraqalpaq ádebiyatı kafedrası aǵa oqıtıwshısı, pedagogika ilimleri boyınsha filosofiya doktorı (PhD) M.Esebaev, Málimleme-resurs orayında 33 jıldan berli miynet etip kiyatırǵan nuranıy, 2022-jılǵı II Respublikalıq kitapqumarlıq hápteliginiń qatnasıwshısı, «Kitapxana aǵlası» kókirek belgisiniń iyesi R.Amanbaeva, MRO xızmetkerleri hám student-jaslar katnastı.

Kesheni alıp barǵan hám shólkemlestirgen Málimleme-resurs orayı ilimiy-metodikalıq hám maǵlıwmatlar bólimi baslıǵı Z.Qaynarova studentlerge jazıwshınıń dóretiwshiligi haqqında maǵlıwmatlar berdi.

Jazıwshınıń búginge shekem 100 den aslam gúrrińleri, 5 povesti, bir romanı respublikalıq gazeta-jurnallarda basılıp, ádebiyat, til, tariyx, kórkem óner ilimlerine baylanıslı 100 den aslam ilimiy maqalaları baspasózde járiyalandı. 2001-jılı «Shuhrat» medalınıń iyesi boldı.

Allanazar Ábdievtiń shıǵarmaları XXI ácirdegi qaraqalpaq ádebiyatınıń ideyalıq-tematikalıq, janrlıq, formalıq hám kórkemlik jaqtan rawajlanıwına salmaqlı úles qostı. Alımnıń ilimiy miynetleri búgingi ádebiyattanıw ilimi menen shuǵıllanıp atırǵan magistrantlar, erkin izleniwshiler, doktorantlar hám oqıtıwshılar ushın tiykarǵı dárek sıpatında xızmet etpekte.

Keshe sońında studentler usınday ádebiy-publicistikalıq hám ilimiy ushırasıwlardı tez-tezden ótkerip turıw boyınsha óz usınısların bildirdi.