Ájiniyaz atındaǵı Nókis mámleketlik pedagogikalıq institutı Mektepke shekemgi tálim kafedrasınıń baslıǵı, pedagogika ilimleriniń doktorı, docent Gúlnara Jumasheva hám usı kafedranıń assistent-oqıtıwshısı Janar Ergalieva Abay atındaǵı Qazaq milliy pedagogikalıq universitetinde shólkemlestirilgen «Bilim beriwdegi innovaciyalar: tájiriybe, máseleler hám perspektivalar» atamasındaǵı alımlar hám muǵallimlerdiń II Xalıqaralıq ilimiy-ámeliy konferenciyasına qatnastı.

Konferenciyanıń ashılıw plenar májilisinde docent G.Jumasheva «Концепция общения на каракалпакском языке в дошкольных образовательных организациях» atamasında, assistent-oqıtıwshı J.Ergalieva sekciyalıq májiliste «Особенности содержательной работы по воспитанию детей дошкольного возраста» atamasındaǵı bayanatları menen shıǵıp sóyledi.

Sonday-aq, olar Qazaq milliy pedagogikalıq universiteti menen birge islesiwdi ele de jetilistiriw maqsetinde Pedagogika hám psixologiya institutınıń mektepke shekemgi tálim hám sociallıq pedagogika kafedrasınıń docenti G.Taubaeva menen birge «Развитие речи детей дошкольного возраста» páninen vebinar-lekciya sabaǵı, sonıń menen birge, «Обучение детей дошкольного возраста к грамоте» atamasında studentler menen, «Модель системы методического сопровождение педагогов» atamasında magistrantlar menen seminar-trening ótkerildi. Student-jaslar ózlerin qızıqtırǵan sorawlardı berip, qızıqlı disput boldı.

NMPI wákilleri universitettiń ilimiy kitapxanası menen tanıstı. Bunnan soń docent G.Taubaeva menen birge Almatı qalası Medeu rayonındaǵı 156-sanlı mektepke shekemgi bilimlendiriw shólkeminde studentlerdiń pedagogikalıq ámeliyatta ótkergen «Robototexnika» atamasındaǵı ashıq sabaǵına qatnasıp, analiz jasadı hám ol jerdegi sharayatlardı kózden ótkerdi.