Usı jıldıń 26-aprel kúni Ájiniyaz atındaǵı Nókis mámleketlik pedagogikalıq institutında student-jaslardıń bántligin támiyinlew maqsetinde bos jumıs orınları miynet yarmarkası bolıp ótti.

Yarmarkaǵa Qaraqalpaqstan Respublikası Mektepke shekemgi hám mektep bilimlendiriw ministrligine qaraslı qalalıq hám rayonlıq xalıq bilimlendiriw, mektepke shekemgi bilimlendiriw bólimleri wákilleri, QR Kásiplik bilimlendiriwdi rawajlandırıw hám muwapıqlastırıw basqarması wákilleri, QR Kámbaǵallıqtı qısqartıw hám bántlik ministrligi, «Ishga marhamat» mono orayı, Ózbekstan Respublikası Prezidenti janındaǵı Mámleketlik xızmetti rawajlandırıw agentligi Qaraqalpaqstan Respublikası filialı, Ózbekstan Respublikası Jaslar isleri agentligi Qaraqalpaqstan Respublikası basqarması hám basqa bir qatar shólkemlerdiń wákilleri qatnastı.

Házirgi waqıtta Nókis mámleketlik pedagogikalıq institutında ulıwma 18 mıń 273 student oqıp atırǵan bolıp, sonnan 9 mıń 328 student bakalavriattıń kúndizgi, 7 mıń 373 student sırtqı, 315 student keshki bilimlendiriw baǵdarlarında, 574 student ekinshi qánigelik boyınsha, al 683 student magistratura basqıshında bilim almaqta.

Miynet yarmarkasında tiykarǵı jumıs beriwshiler esaplanǵan Qaraqalpaqstan Respublikası Mektepke shekemgi hám mektep bilimlendiriw ministrlikleri sistemasındaǵı basqarma hám bólimler menen birgelikte isbilermenlik subektleri, mámleketlik hám mámleketlik emes mákeme, kárxana hám shólkemlerdiń wákilleri bos jumıs orınları menen qatnastı.

– Bıyılǵı oqıw jılında Nókis mámleketlik pedagogikalıq institutın bakalavriattıń kúndizgi tálim baǵdarları boyınsha ulıwma 2 mıń 750 pitkeriwshi, magistratura qánigelikleri boyınsha 663 student pitkerip shıǵıwı kútilmekte. Miynet yarmarkasında 1-2-3-kurs studentleri menen birge usı pitkeriwshilerdiń de bántligin támiyinlew, olarǵa tiyisli tarawlar boyınsha jumıs orınlarına jollamalar beriw, jumıs beriwshiler menen shártnamalar dúziw jumısları alıp barıldı, – deydi marketing hám studentler ámeliyatı bóliminiń baslıǵı P.Xojaniyazov.

NMPI baspasóz xızmeti.