Ájiniyaz atındaǵı Nókis mámleketlik pedagogikalıq institutı rektoratı hám kásiplik awqamı komiteti arasında 2021-2023-jıllarǵa dúzilgen jámáátlik shártnamasınıń 2022-jıldaǵı orınlanıwı, sonday-aq, 2023-2025-jıllarǵa belgilengen jámáátlik shártnamasın qabıllawǵa arnalǵan konferenciya shólkemlestirildi.

Konferenciya kún tártibinen institutta jumıs isleytuǵın xızmetkerler hám bilim alıp atırǵan studentlerdiń sociallıq-ekonomikalıq, huqıqıy máplerin qorǵaw boyınsha 2022-jılı alıp barılǵan jumıslar, jámáátlik shártnama boyınsha institut rektoratı hám kásiplik awqamı komiteti tárepinen shólkemlestirilgen ilajlar jáne 2023-2025-jıllarǵa belgilengen jámáátlik shártnamasın qabıllaw máseleleri orın aldı hám shıǵıp sóylewshiler tárepinen delegatlarǵa tolıq maǵlıwmatlar berildi.

Atap ótilgenindey, kásiplik awqamı komiteti institut xızmetkerleri hám studentlerin xoshametlew komissiyasına aǵza bolıp, usı komissiya arqalı materiallıq hám ruwxıy xoshametlew, miynetti qorǵawdı shólkemlestiriw hám orınlanıwın qadaǵalawda qatnastı, instituttıń ishki tártip-qaǵıydaların túsindiriw jumısların alıp barıp, xızmetkerlerdiń jumıs ornı qısqartılıwı boyınsha komitettiń aldın ala kelisimi alınıwı jolǵa qoyıldı. Jıl dawamında 15 xızmetker sociallıq qamsızlandırıw qorı esabınan, 38 xızmetker kásiplik awqamı tólemi qarjıları esabınan respublikalıq dem alıw hám salamatlıǵın tiklew oraylarında bolıp qayttı.

Jıl dawamında barlıq bayram sáneleri kúnleri tańlawlar, sport jarısları, dógerek sáwbetleri, ushırasıwlar, oqıw seminarları shólkemlestirilip, kásiplik awqamı komiteti hám institut sport klubı, jámáátlik shólkemler tárepinen qarjılandırılıp barıldı.

Sonıń menen birge, jámáátlik shártnama tiykarında xızmetkerlerdiń jumıs sharayatların jaqsılaw, aylıq miynet haqısın óz waqtında beriw, miynetti qorǵaw hám texnikalıq qáwipsizlik ilajların jolǵa qoyıw, studentlerdiń oqıw sharayatların jaqsılaw hám stipendiyaların óz waqtında beriw baǵdarında da unamlı jumıslar ámelge asırıldı.

Konferenciyada kún tártibindegi máseleler boyınsha tiyisli qararlar qabıl etildi.

NMPI baspasóz xızmeti.