Búgin, 2-may kúni Ájiniyaz atındaǵı Nókis mámleketlik pedagogikalıq institutı Tariyx fakultetinde studentlerdiń ata-anaları menen bolıp ótken ushırasıwda jámiyette sociallıq salamat ortalıqtı qáliplestiriw hám korrupciyalıq jaǵdaylardıń aldın alıw boyınsha birgelikte ámelge asırılıwı zárúr bolǵan jumıslar dodalandı.

Ushırasıwda instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov, korrupciyaǵa qarsı gúresiw «Komplaens qadaǵalaw» sistemasın basqarıw bólimi baslıǵı Palmurza Xojabekov sózge shıǵıp, búgingi kúnde korrupciya, yaǵnıy qanday da bir máp esesine xızmet wákilliginen nızamǵa qayshı túrde paydalanıw dúnyanıń barlıq mámleketlerinde úlken qáwip sıpatında bahalanıp atırǵanlıǵın atap ótti.

Korrupciyanıń túp-tiykarı, eń aldı menen, adamnıń minez-qulqına, etikasına, sonday-aq, jámiyettegi ortalıqqa hám nızam ústinligine barıp taqaladı.

Aqılıy jaqtan jetik hám salamat oy-pikirge iye adam korrupciyaǵa jol qoyıwdı hújdanlıq jaqtan qabıl ete almaydı. Óz lawazımlıq wákilliklerinen nızamǵa qayshı ráwishte paydalanıwdı xalqına hám mámleketine qıyanet dep esaplaydı.

Bunday joqarı mánawiyatlı adamlardı tárbiyalawda jámiyettegi ortalıq úlken áhmiyetke iye. Jámiyet korrupciyanı jınayat hám jol qoyıp bolmaytuǵın jaǵday sıpatında bahalasa, bul pikir áwladtan-áwladqa ótip, ózine tán ózgermes stereotipke aylansa, bunday jámiyetten joqarı etikalı adamlar jetisip shıǵadı. Bul arqalı korrupciyanıń tamırına balta urıladı.

Tariyxtan hám házirgi dáwir kózqarasınan alıp qaraǵanda, korrupciyaǵa qarsı gúresiwdiń baslı eki jolı kózge taslanadı.

Birinshisi, oǵada keskin nızamlı sharalardı qollanıw bolsa, ekinshisi, jámiyette korrupciyaǵa qarsı ruwxıy ortalıqtı qáliplestiriw hám adamlardıń etikasına dıqqat awdarıw bolıp tabıladı.

Jámiyette korrupciyaǵa qarsı salamat ruwxıy ortalıqtı engiziw, adamlardı korrupciyaǵa baǵdarlaytuǵın jaǵdaylardı saplastırıw, bunda tálim-tárbiyaǵa joqarı dárejede dıqqat awdarıw házirgi waqıtta kópshilik mámleketler tárepinen korrupciyanıń aldın alıwda eń durıs jol dep bahalanbaqta.

Solay eken, bunday jaǵdaylarda institut hám ata-analardıń birgelikte jumıs alıp barıwı maqsetke muwapıq boladı.

Ilajda usı baǵdardaǵı ámelge asırılatuǵın jumıslar dodalanıp, óz ara pikir almasıldı.

Sonday-aq, belsendi studentlerge húrmet jarlıqları tapsırıldı.

NMPI baspasóz xızmeti.