Ájiniyaz atındaǵı Nókis mámleketlik pedagogikalıq institutı óziniń 90 jılǵa shamalas tariyxı, bilimlendiriw tarawında óz ornı hám qádiriyatlarına iye bolǵan ullı dárgay bolıp tabıladı. Ózbekstan Qaharmanı, xalıq shayırı Ibrayım Yusupovtıń sózi menen aytqanda «Qaraqalpaqqa qalıń kitap oqıtqan» bul dárgayda búgingi kúnde 19 mıńǵa shamalas keleshek iyeleri oqıp, bilim almaqta.

Institutta zamanagóy bilim hám kónlikpelerge iye bolǵan maman pedagog kadrlardı tayarlawǵa ayrıqsha itibar qaratılmaqta. Bul maqsetlerge erisiw, sonday-aq, joqarı maǵlıwmatqa iye bolaman degen jaslar ushın sharayatlar jaratılıp, instituttıń materiallıq-texnikalıq bazası jetilistirilip atır.

Atap aytqanda, búgingi kúnde mámleketlik byudjet qarjıları esabınan qurılıp atırǵan instituttıń 6 korpustan ibarat 2 mıń orınǵa mólsherlengen bas hám oqıw imaratlarınıń qurılıs jumısları sońǵı basqıshqa kelgen bolıp, ishki pardozlaw jumısları alıp barılmaqta.

Búgingi kúnde instituttıń tórtinshi oqıw imaratında rekonstrukciya jumısları alıp barılıp, Mektepke shekemgi tálim hám Dene mádeniyatı fakultetleriniń studentleri oqıw jılınıń basınan zamanagóy tiptegi oqıw imaratında bilim almaqta. Al, 1 mıń 50 orınǵa mólsherlengen besinshi oqıw imaratınıń rekonstrukciya isleri juwmaqlanıw aldında turıptı.

Qaraqalpaqstan Respublikası Joqarǵı Keńesiniń Málimleme xızmeti.