Ájiniyaz atındaǵı Nókis mámleketlik pedagogikalıq institutında Ózbekstan Qaharmanı, Ózbekstan hám Qaraqalpaqstan xalıq shayırı Ibrayım Yusupovtıń tuwılǵanına 94 jıl tolıwına arnalǵan «Poeziya juldızı» atamasındaǵı ilimiy-teoriyalıq hám kórkem-ádebiy konferenciya bolıp ótti.

Túrkiy tiller fakulteti qaraqalpaq ádebiyatı kafedrası tárepinen shólkemlestirilgen ilajǵa Ózbekstan Respublikası Ilimler Akademiyası Qaraqalpaqstan bólimi Qaraqalpaq gumanitar ilimler ilimiy-izertlew institutı qaraqalpaq ádebiyatı sektorınıń baslıǵı, filologiya ilimleriniń doktorı, professor Ziyada Bekbergenova, instituttıń qaraqalpaq tili kafedrasınıń docenti, filologiya ilimleriniń doktorı Alima Pirniyazova, qazaq tili hám ádebiyatı kafedrasınıń docenti, filologiya ilimleri boyınsha filosofiya doktorı Tursınay Tórtkúlbaeva hám basqa da jas ilimpazlar, magistrantlar hám studentler qatnastı.

Konferenciyanıń dáslepki bóliminde qaraqalpaq ádebiyatınıń bayteregi, ullı kórkem sóz zergeri, xalqımızdıń súyikli shayırı Ibrayım Yusupovtıń ómiri, dóretiwshiligi, onıń shıǵarmalarındaǵı frazeologizmler, lirikalıq qaharman, epikalıq poeziyasında miflik-romantikalıq motivler, shayır lirikasınıń formaları, sonday-aq, búgingi jaslar poeziyasında tutqan ornı haqqındaǵı bayanatlar tıńlandı.

Ilaj qaraqalpaq ádebiyatı kafedrası janındaǵı «Ziywar» kórkem-ádebiy dógeregi aǵzaları, sonday-aq, «Tumaris» qosıq hám ayaq-oyın xalıq ansambli aǵzalarınıń atqarıwındaǵı koncert baǵdarlaması menen dawam etti.

NMPI baspasóz xızmeti.