Qádirbay ata Narmanov búgingi kúnde Qaraqalpaqstan Respublikasında ómir súrip atırǵan Ekinshi jer júzilik urıs qatnasıwshılarınıń biri. Ol 1943-jılı áskeriy tayarlıqtı ótep, Oraylıq fronttıń 60-armiyası artilleriya divizionı qatarında fashist basqınshılarǵa qarsı mártlershe sawashqa kirisken hám urısta qaharmanlıq, mártliktiń joqarı úlgilerin kórsetken. 1944-jılı sawash maydanlarında arttırǵan awır jaraqatı sebepli fronttan elge oralǵan.

Urıstan sońǵı jıllarda elimizdiń qayta tikleniwi, rawajlanıwı jolında ayanbay miynet etken Qádirbay ata búgingi kúnde elimizdiń, el basshılarımızdıń itibarına bólenbekte.

Ájiniyaz atındaǵı Nókis mámleketlik pedagogikalıq institutı jámááti de 9-may – Eslew hám qádirlew kúni qarsańında atanıń hal-jaǵdayınan xabar alıp, birge gúrrińlesip, búgingidey tınısh-paraxat turmıstıń qádirine jetip, Watan ushın xızmet etiwdiń ullı ekenligi haqqında pikirlesti.

Bayram múnásibeti menen alıp kelgen sawǵaların tapsırıp, Qádirbay ataǵa uzaq ómir tiledi.

NMPI baspasóz xızmeti.