Aldın xabar bergenimizdey, usı jıldıń 14-18-may kúnleri Ferǵana qalasında bolıp ótken «Universiada-2023» sport oyınlarınıń jeńil atletika boyınsha respublikalıq final basqıshında Qaraqalpaqstan Respublikası saylandı komandası aǵzaları ulıwma 6 altın, 7 gúmis hám 1 qola medalların jeńip alıp, tariyxıy nátiyjege erisken edi.

Álbette, respublikamız komandası quramında qatnasqan Ájiniyaz atındaǵı Nókis mámleketlik pedagogikalıq institutı studentleri de jarısta joqarı nátiyjelerdi qolǵa kirgiziwge múnásip úleslerin qostı.

Búgin, 20-may kúni Nókis temir jol vokzalında sportshılar hám olardıń trenerlerin saltanatlı kútip alıw ilajı bolıp ótti.

Oǵan Qaraqalpaqstan Respublikası Jaslar siyasatı hám sport ministrligi, joqarı oqıw orınları, sportshılardıń ata-anaları, sonday-aq, keń jámiyetshilik hám ǵalaba xabar quralları wákilleri qatnastı.

Ilajda sózge shıqqanlar jaslardı hám olardıń ustazların úlken nátiyje menen qutlıqladı.

Esletip ótemiz, Universiada-2023» sport oyınlarınıń jeńil atletika boyınsha respublikalıq final basqıshında qızlar arasında:

– 100 metr aralıqqa barerden ótip juwırıw boyınsha Munisa Oktyabrova 1-orın (NMPI);
– 200 metrge juwırıwdan Rano Jamǵırbaeva 2-orın (NMPI);
– Yadro ılaqtırıw boyınsha Nargiza Turdıniyazova 2-orın (QMU);
– 4×100 metr aralıqqa estafetalıq juwırıwdan Rano Jamǵırbaeva, Laylo Egamberdieva, Dildora Asherbaeva, Munisa Oktyabrovalardan ibarat qızlar komandası 2-orın (NMPI);
– 4×400 metr aralıqqa estafetalıq juwırıwdan Rano Jamǵırbaeva, Dildora Asherbaeva, Munisa Oktyabrova, Shaxrizada Shukurullaevalardan ibarat qızlar komandası 1-orındı iyelegen bolsa (NMPI);

Erler arasında:

– Diyarbek Shamuratov 800 metrge juwırıwdan 2-orın, al 1 500 metrge juwırıw boyınsha 1-orın (QMU);
– 110 metr aralıqqa barerden ótip juwırıw boyınsha Mirjan Abdijaliev 3-orındı iyeledi (QMU).

Sportshılardı jarısqa trenerler Arzubay Jumanov hám Barlıqbay Jumanovlar tayarladı.

NMPI baspasóz xızmeti.