Usı jıldıń 23-may hám 10-iyun kúnleri aralıǵında Rossiya Federaciyasınıń Qazan federal universiteti hám Ájiniyaz atındaǵı Nókis mámleketlik pedagogikalıq institutı arasında dúzilgen birge islesiw shártnaması tiykarında Nókis rayonı aymaǵındaǵı Kerder mádeniyatına tiyisli «Haywanqala» estelik kompleksinde xalıqaralıq arxeologiyalıq ekspediciya ótkerilmekte.

Xalıqaralıq kólemde birinshi márte ótkerilip atırǵan bul arxeologiyalıq ekspediciyaǵa Rossiya Federaciyası Tatarstan Respublikası Ilimler Akademiyası A.X.Xalikov atındaǵı Arxeologiya institutınıń direktorı, tariyx ilimleriniń doktorı, professor Ayrat Sitdikov basshılıǵındaǵı ilimpazlar, sonıń menen birge, Rossiya, Qazaqstannıń joqarı oqıw orınları, ilimiy-izertlew oraylarınan 20 dan aslam qánigeler, sonday-aq, instituttıń Tariyx fakulteti professor-oqıtıwshıları hám student-jasları qatnaspaqta.

– Joqarı bilimlendiriw, ilim hám innovaciyalar ministri, akademik Ibrohim Abdurahmonovtıń qaraqalpaqstanlı student-jaslar menen bolıp ótken ushırasıwında men sırt ellerdiń joqarı oqıw orınları professor-oqıtıwshıları hám studentleri menen tájiriybe almasıw imkaniyatın beretuǵın xalıqaralıq ekspediciyalar shólkemlestiriw usınısın bildirgen edim. Mine, búgin men hám meniń menen birge oqıp atırǵan jaslar usınday imkaniyatqa iye bolıp atırmız. Bul bizlerdiń teoriyalıq bilimlerimizdi ámeliyatta bekkemlew imkaniyatın beredi, – deydi Nókis mámleketlik pedagogikalıq institutı Tariyx fakultetiniń studenti J.Jollıbaeva.

«Haywanqala» arxeologiyalıq esteliginde ámelge asırılatuǵın xalıqaralıq ekspediciyadan gózlengen baslı maqset arxeologiyalıq qazıw nátiyjesinde tabılǵan buyımlar hám mádeniy qatlamlar boyınsha xalıqaralıq ilimiy pikirdi qáliplestiriw, sonday-aq, ilimiy juwmaqlar shıǵarıw boyınsha belgilengen jumıslardı orınlawdan ibarat.

Bunıń ushın institut tárepinen 1 milliard 400 million sumǵa arnawlı shatırlar hám 4 milliard sumǵa qazıw jumıslarında paydalanılatuǵın arxeologiyalıq ásbap-úskeneler satıp alındı.

Toplanǵan materiallar tiykarında ilimiy-izertlew jumısların alıp barıw, olardıń nátiyjelerin keń jámiyetshilikke, sonıń ishinde, xalıqaralıq kólemde járiyalaw, instituttıń Tariyx fakulteti studentleriniń teoriyalıq bilimlerin ámeliyat barısında bekkemlew, sırt ellerdegi joqarı oqıw orınları hám ilimiy orayları menen tıǵız birge islesiwdi jolǵa qoyıw xalıqaralıq ilimiy-arxeologiyalıq ekspediyasınan kútilip atırǵan ámeliy nátiyjeler bolıp esaplanadı.

NMPI baspasóz xızmeti.