Búgin, 29-may kúni Ájiniyaz atındaǵı Nókis mámleketlik pedagogikalıq institutında «Zamanagóy talaplar sharayatında pedagogikalıq bilimlendiriw sapası» atamasındaǵı «IFTE-2023: Uzbekistan» xalıqaralıq konferenciyası óz jumısın basladı.

Konferenciyanıń ashılıw plenar májilisinde Joqarı bilimlendiriw, ilim hám innovaciyalar ministrligi Qaraqalpaqstan Respublikası aymaqlıq basqarmasınıń baslıǵı Nursultan Kayupov, Evraziya pedagogikalıq universitetleri associaciyasınıń prezidenti, Moskva mámleketlik pedagogikalıq universiteti rektorı Aleksey Lubkov, Qazan federal universiteti Psixologiya hám bilimlendiriw institutı direktorı Aydar Kalimullin, sonday-aq, institut rektorı Bayrambay Otemuratovlar sózge shıǵıp, sońǵı jıllarda mámleketimizde joqarı bilimlendiriw tarawın sapalıq jaqtan jańa basqıshqa kóteriw maqsetinde ámelge asırılıp atırǵan reformalardıń ámeliy nátiyjeleri haqqında maǵlıwmatlar berdi.

Búgingi kúnde joqarı tájiriybeli qánigelerdi tayarlaw tek ǵana oqıw ornınıń emes, sonıń menen birge, xalıqaralıq dárejede birge islesiwdi jolǵa qoyǵan pútkil bilimlendiriw sistemasınıń wazıypasına aylandı. Bul, álbette, ilim hám bilimlendiriw baǵdarındaǵı potenciallarımızdı birlestiriwdi talap etedi.

Konferenciyanıń baslı maqseti:

• Bilimlendiriw tarawında jumıs alıp baratuǵın ilimpazlar, ámeliyatshılar hám mámleketlik hákimiyat uyımları wákilleri arasında birge islesiwdi rawajlandırıw;
• Bilimlendiriw procesin jetilistiriw maqsetinde milliy hám xalıqaralıq kólemde muǵallimlerdiń qánigeligin jetilistiriw tarawında izretlewler hám innovaciyalardı xoshametlew, sonday-aq, tájiriybe almasıw;
• Bilimlendiriw tarawında muǵallimler hám qánigelerdi tayarlaw sapasın arttırıw baǵdarında óz ara birge islesiwdi qollap-quwatlawdan ibarat.

Konferenciya zamanagóy sociallıq-mádeniy sharayatta bilimlendiriwdiń dástúrleri, jańasha qatnaslar, bilimlendiriwdiń nátiyjeliligin arttırıwda muǵallimlerdiń metodikalıq tayarlıǵı, pedagog kadrlar tayarlawda tariyxıy-pedagogikalıq qatnas sıyaqlı baǵdarlardı óz ishine aladı.

Xalıqaralıq konferenciyaǵa Rossiya, Germaniya, Qıtay, Sloveniya, Ispaniya, Malayziya, Pakistan, Filippin hám Qazaqstan mámleketlerinen dúnyaǵa belgili pedagog ilimpazlar, joqarı oqıw orınları hám ilimiy-izertlew oraylarınıń wákilleri qatnaspaqta.

Eki kún dawam etetuǵın konferenciya sheńberinde 3 plenar hám 30 sekciya májilisi, 5 dógerek sáwbeti, rossiyalı pedagoglar qatnasıwında ulıwma bilim beriw mektepleriniń muǵallimleri hám mektepke shekemgi bilimlendiriw shólkemleriniń tárbiyashıları ushın master-klasslar, joqarı oqıw orınları doktorant hám magistrantları ushın ashıq lekciyalar ótkeriliwi jobalastırılǵan.

Ilaj juwmaǵında konferenciya qatnasıwshılarına sertifikatlar, minnetdarshılıq xatları, joqarı oqıw orınları, ulıwma bilim beriw mektepleri hám mektepke shekemgi bilimlendiriw shólkemleriniń pedagogları ushın sawǵalar tapsırıladı.

Konferenciya juwmaqları boyınsha DOI, Google Scholar, OPEN AIRE bazasındaǵı elektron jurnalda 296 maqala, Joqarı attestaciyalıq komissiyası quramına kiretuǵın «Ilim hám jámiyet» jurnalında 30 maqala, sonday-aq, Web of Science quramına kiretuǵın Bolgariya jurnalında 100 den aslam maqalalar járiyalanıwı kútilmekte.

Xalıqaralıq konferenciya 31-mayǵa shekem dawam etedi.

Ájiniyaz atındaǵı Nókis mámleketlik pedagogikalıq institutı baspasóz xızmeti.