Aldın xabar bergenimizdey, Ájiniyaz atındaǵı Nókis mámleketlik pedagogikalıq institutında «Zamanagóy talaplar sharayatında pedagogikalıq bilimlendiriw sapası» atamasındaǵı «IFTE-2023: Uzbekistan» xalıqaralıq konferenciyası bolıp ótpekte.

Konferenciyanıń ekinshi kúni respublikamızdaǵı mektepke shekemgi bilimlendiriw shólkemleri hám ulıwma bilim beriw mektepleriniń pedagog qánigeleri qatnasıwındaǵı «Bilimlendiriwdegi innovaciyalar: Xalıqaralıq birge islesiw traektoriyaları» atamasındaǵı xalıqaralıq forum menen dawam etpekte.

«Rossiya pedagogları» jámiyeti tárepinen shólkemlestirilgen forumda ulıwma bilim beriw mektepleriniń muǵallimleri hám mektepke shekemgi bilimlendiriw shólkemleriniń tárbiyashıları ushın sheberlik sabaqları, joqarı oqıw orınlarınıń doktorant hám magistrantları ushın ashıq lekciyalar ótkerilmekte.

Ilaj juwmaǵında konferenciya qatnasıwshılarına sertifikatlar, minnetdarshılıq xatları, joqarı oqıw orınları, ulıwma bilim beriw mektepleri hám mektepke shekemgi bilimlendiriw shólkemleriniń pedagogları ushın sawǵalar tapsırıladı.

Konferenciyanıń baslı maqseti:

• Bilimlendiriw tarawında jumıs alıp baratuǵın ilimpazlar, ámeliyatshılar hám mámleketlik hákimiyat uyımları wákilleri arasında birge islesiwdi rawajlandırıw;
• Bilimlendiriw procesin jetilistiriw maqsetinde milliy hám xalıqaralıq kólemde muǵallimlerdiń qánigeligin jetilistiriw tarawında izretlewler hám innovaciyalardı xoshametlew, sonday-aq, tájiriybe almasıw;
• Bilimlendiriw tarawında muǵallimler hám qánigelerdi tayarlaw sapasın arttırıw baǵdarında óz ara birge islesiwdi qollap-quwatlawdan ibarat.

Konferenciya zamanagóy sociallıq-mádeniy sharayatta bilimlendiriwdiń dástúrleri, jańasha qatnaslar, bilimlendiriwdiń nátiyjeliligin arttırıwda muǵallimlerdiń metodikalıq tayarlıǵı, pedagog kadrlar tayarlawda tariyxıy-pedagogikalıq qatnas sıyaqlı baǵdarlardı óz ishine aladı.

Xalıqaralıq konferenciyaǵa Rossiya, Germaniya, Qıtay, Sloveniya, Ispaniya, Malayziya, Pakistan, Filippin hám Qazaqstan mámleketlerinen dúnyaǵa belgili pedagog ilimpazlar, joqarı oqıw orınları hám ilimiy-izertlew oraylarınıń wákilleri qatnaspaqta.

Xalıqaralıq konferenciya 31-mayǵa shekem dawam etedi.

Ájiniyaz atındaǵı Nókis mámleketlik pedagogikalıq institutı baspasóz xızmeti.