Respublikamızdıń barlıq joqarı oqıw orınları studentleri arasında ótkerilgen «Universiada-2022» sport jarıslarınıń respublikalıq final basqıshınıń ulıwmalıq juwmaqları járiyalandı.

Áhmiyetlisi, «kishi Olimpiada» esaplanǵan «Universiada-2022» sport jarıslarında Qaraqalpaqstan Respublikası saylandı komandası ulıwma komandalıq esapta 3-orındı iyeledi.

Sporttıń 15 túri boyınsha ótkerilgen jarıslardan basketbol boyınsha erler hám hayal-qızlar komandalarınıń, sonday-aq, stritbol hám Workout jarıslarında sportshılarımızdıń altın medallardı, gandbol boyınsha erler komandasınıń gúmis, shaxmat boyınsha erler hám hayal-qızlar komandasınıń jáne regbi boyınsha erler komandasınıń qola medalların qolǵa kirgiziwi, sonıń menen birge, basqa da sport jarıslarında komandalıq hám jeke esapta jaslarımızdıń jaqsı nátiyjelerge erisiwi usınday joqarı kórsetkishke iye bolıwǵa tiykar jarattı.

Ulıwma komandalıq esapta 227 upay toplaǵan Tashkent wálayatı 1-orın, 196 upay toplaǵan Xorezm wálayatı 2-orındı iyelegen bolsa, jerleslerimiz 193 upay menen kúshli úshlikten orın aldı.

«Universiada-2022» sport jarıslarınıń respublikalıq final basqıshı shólkemlestiriw komiteti tárepinen jeńimpaz hám sıylı orın iyelerine usı jıldıń 15-iyun kúni «Prezident sawǵası» tapsırılıwı jobalastırılǵan.

«Prezident sawǵası» Qaraqalpaqstan Respublikasınan Ájiniyaz atındaǵı Nókis mámleketlik pedagogikalıq institutına tapsırıladı.

Esletip ótemiz, bunnan aldın «Universiada-2020» sport jarıslarınıń respublikalıq final basqıshı juwmaqları boyınsha Qaraqalpaqstan Respublikası saylandı komandası ulıwma komandalıq esapta 2-orındı iyelegen hám bul nátiyjege erisiwge úlken úles qosqan Ájiniyaz atındaǵı Nókis mámleketlik pedagogikalıq institutına 80 million sumlıq sport inventarlarınan ibarat «Prezident sawǵası» tapsırılǵan edi.

NMPI baspasóz xızmeti.