Aldın xabar bergenimizdey, Ájiniyaz atındaǵı Nókis mámleketlik pedagogikalıq institutında 2023-2024-oqıw jılı qabıllawında bakalavriattıń 60111900 – Mektepke shekemgi hám baslawısh tálimde dene tárbiyası hám sport tálim baǵdarına qabıllaw ushın kásiplik (dóretiwshilik) imtixanları ótkerilmekte.

29-iyul kúni usı tálim baǵdarına hújjet tapsırǵan abiturientler jeńil atletika boyınsha imtixanda qatnasqan bolsa, búgin, 30-iyul kúni belgilengen reje tiykarında gimnastika boyınsha ózleriniń fizikalıq tayarlıqları hám imkaniyatların kórsetiwge háreket etti.

Imtixanda er jigitler turnikte tartılıw, al qızlar gimnastikalıq skameykaǵa tayanıp, qoldı búgip-jazdırıw boyınsha belgilengen shınıǵıwlardı ámelge asırdı.

Imtixanlardıń ádil hám ashıq-aydın ótkeriliwi ata-analar hám jámiyetlik shólkemlerdiń wákilleri tárepinen qadaǵalap barıldı.

Solay etip, Ájiniyaz atındaǵı Nókis mámleketlik pedagogikalıq institutında 2023-2024-oqıw jılı qabıllawında bakalavriattıń ayrıqsha qábilet talap etiletuǵın tálim baǵdarlarına usı jıldıń 24-iyul kúninen baslanǵan kásiplik (dóretiwshilik) imtixanları óz juwmaǵına jetti.

Kásiplik (dóretiwshilik) imtixanlardıń juwmaqları boyınsha qosımsha maǵlıwmat beriledi.

NMPI baspasóz xızmeti.