Búgin, 1-avgust kúni respublikamızdıń barlıq aymaqları qatarına Qaraqalpaqstan Respublikası Nókis qalasındaǵı 6 orında 2023-2024-oqıw jılı ushın joqarı oqıw orınlarına kiriw test sınaqları baslandı.

Joqarı bilimlendiriw, ilim hám innovaciyalar ministriniń birinshi orınbasarı Komiljon Karimov Respublikalıq oyın túrleri hám jeńil atlektika boyınsha qánigelestirilgen balalar hám jas óspirimler sport mektebinde ótkerilip atırǵan test sınaqları procesin kózden ótkerdi.

Sonday-aq, usı jerde abiturientlerdiń ata-anaları ushın jaratılǵan sharayatlar, test procesin onlayn baqlaw imkaniyatı menen tanıstı. Ata-analar menen bolıp ótken sáwbetlesiwde Qaraqalpaqstan Respublikası abiturientleri ushın bıyılǵı qabıllawda mámleketlik grant tiykarında 3 mıń orın ajıratılǵanı, sonıń menen birge, jaslardı joqarı bilimlendiriwge qamtıp alıw baǵdarında ámelge asırılıp atırǵan jumıslar haqqında maǵlıwmatlar berdi.

NMPI baspasóz xızmeti.