Búgin, 2-avgust kúni 2023-2024-oqıw jılı ushın joqarı oqıw orınlarına kiriw test sınaqlarınıń ekinshi kúni joqarı shólkemleskenlik penen dawam etpekte.

Respublikalıq oyın túrleri hám jeńil atlektika boyınsha qánigelestirilgen balalar hám jas óspirimler sport mektebinde ótkerilip atırǵan test sınaqları procesin abiturientlerdiń ata-anaları, ustazları hám basqa da jaqın adamları onlayn tárizde baqlap barmaqta.

Bul jerde Ájiniyaz atındaǵı Nókis mámleketlik pedagogikalıq institutı wákillerinen dúzilgen «Volontyorlar toparı» ata-analardan sociologiyalıq sorawnamalar ótkerip, olarǵa zárúr maǵlıwmatlardı bermekte.

Házirgi waqıtta test sınaqlarınıń birinshi smenası óz juwmaǵına jetti. Ekinshi smena 15:00 hám 18:00 aralıǵında bolıp ótedi.

Abiturientlerden ruxsatnamada kórsetilgen waqıtta test ótkeriw ornına pasportı (yamasa ID-kartası) hám abiturient ruxsatnaması menen keliwin soraymız.

Pasport nusqası yamasa basqa hújjetler menen kelgen, sonday-aq, keshigip kelgen abiturientler test sınaqlarına kirgizilmeydi!

Test sınaqları tolıq videobaqlaw astında onlayn translyaciya etilgen halda ótkerilmekte hám processlerdi test2023.uz saytı arqalı onlayn baqlap barıw múmkin.

Barlıq abiturientlerge tabıslar tileymiz!

NMPI baspasóz xızmeti.