Búgin, 15-avgust kúni Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikası Joqarǵı Keńesi Baslıǵınıń orınbasarı Rustam Saparbaev jaslar menen ashıq sáwbetlesiw ótkerdi.

Ilajǵa ministrlikler hám shólkemlerdiń basshıları, jaslar siyasatı boyınsha tiyisli taraw wákilleri, elimizge belgili nuranıy aqsaqallar, institut professor-oqıtıwshıları, belsendi studentleri, máhállelerdegi jámlespegen jaslar, sonday-aq, ǵalaba xabar quralları wákilleri qatnastı.

Ashıq sáwbetlesiw barısında búgingi kúnde mámleketimizde jaslar siyasatı baǵdarında ámelge asırılıp atırǵan reformalar, atap aytqanda, olardıń oqıwı, bilim alıwı, ilimiy-izertlew jumısları, isbilermenlik penen shuǵıllanıwı, kásip-óner úyrenip, elimizdiń rawajlanıwına múnásip úleslerin qosıwı ushın barlıq sharayatlar jaratılıp, jaslardıń progressiv baslamaları ámeliy jaqtan qollap-quwatlanıp atırǵanı haqqında turmıslıq mısallar menen maǵlıwmatlar berildi.

Óz gezeginde, jaslar sáwbetlesiw barısında ózleriniń usınısların bildirip, Joqarǵı Keńes Baslıǵınıń orınbasarı menen alǵa qoyǵan maqsetleri haqqında pikirlesip, másláhátler aldı.

Jaslar tárepinen bildirilgen pikir hám usınıslar jazıp alınıp, tiyisli tártipte úyrenip shıǵıw boyınsha juwapkerlerge tapsırmalar berildi.

Ilajǵa Qaraqalpaqstan Respublikası Joqarǵı Keńesiniń komitet baslıǵı Sharapat Ótemisov qatnastı.

NMPI baspasóz xızmeti.