Ájiniyaz atındaǵı Nókis mámleketlik pedagogikalıq institutı muzıkalıq tálim hám kórkem óner qánigeliginiń 2-kurs magistrantı, Zulfiya atındaǵı mámleketlik sıylıqtıń laureatı Erkinay Orınbaeva Qaraqalpaqstan Respublikası «Qızlarjan» klubınıń bas koordinatorı boldı.

Erkinay institutta tájiriybeli professor-oqıtıwshılardan tálim alıp, dóretiwshilik penen qosa ilimiy basshısı, muzıkalıq tálim kafedrasınıń docenti Sofiya Tájetdinova menen birge ilimiy-izertlew jumısların alıp barmaqta.

Ol dosları arasında óziniń shaqqanlıǵı, miynet súygishligi, bilimi menen ajıralıp turadı. Kóplegen xalıqaralıq hám respublikalıq tańlawlarda, jaslar festivallarında, Nawrız hám Ǵárezsizlik bayramları múnásibeti menen ótkeriletuǵın koncert baǵdarlamalarında belsene qatnasıp, diplomlar, húrmet jarlıqları menen sıylıqlanǵan.

– Qızlarımızdıń jámiyette múnásip orınǵa iye bolıwında mámleketimiz basshısı tárepinen sheksiz imkaniyatlar jaratılmaqta. Búgin jaslar qatarında qızlarımızdıń tek ǵana respublikalıq kólemde emes, sonıń menen birge, dúnya júzi boyınsha erisip atırǵan úlken tabısları menen maqtanısh etsek arzıydı. Biz, qızlar birgelikte watanımızdıń bayraǵın kóklerge kóterip, Jańa Ózbekstannıń keleshegin birgelikte quramız, — deydi Erkinay Orınbaeva.

NMPI baspasóz xızmeti.