Studentlerdi turaq jay menen támiyinlewde náwbetlerdiń aldın alıw, oqıw jılı baslanıwı qarsańında studentlerdiń turaq jaysız qalıwı jaǵdayların boldırmaw maqsetinde Ájiniyaz atındaǵı Nókis mámleketlik pedagogikalıq institutında arnawlı oray jumısları jolǵa qoyıldı.

Orayda instituttıń studentlerdi turaq jay menen támiyinlew jumısların muwapıqlastırıw bóliminiń qánigeleri hám tyutorlar tárepinen turaq jayǵa mútáj bolǵan studentlerdi jataqxana hám ijara úyleri menen támiyinlew boyınsha ámeliy járdem berilmekte.

Instituttıń studentler turaq jayları hám ijara úyleri boyınsha maǵlıwmatlar orayı 1-sanlı studentler turaq jayı aldında jumıs alıp barmaqta.

– Instituttıń Mektepke shekemgi tálim fakulteti defektologiya tálim baǵdarınıń 2-kurs studentimen. Ózim Xorezm wálayatı Úrgenish rayonında jasayman. Búgin institutımızda shólkemlestirilgen arnawlı orayǵa kelip, bul jerdegi maǵlıwmatlar bazasınan paydalanǵan halda studentler turaq jayına ornalasıw ushın tiyisli hújjetlerimdi tapsırdım. Bul jerde bizlerge qánigeler tárepinen studentler turaq jayı hám ijara úylerine ornalasıw tártibi haqqında maǵlıwmatlar berildi, – deydi Banu Ataxanova.

Esletip ótemiz, instituttıń joqarǵı kurs studentleri studentler turaq jayına ornalasıw ushın instituttıń ttj.ndpi.uz platforması arqalı, al bıyılǵı jılı 1-kursqa qabıl etilgenler Birden-bir interaktiv mámleketlik xızmetler portalı – my.gov.uz arqalı onlayn tárizde arza jiberiwi múmkin.

Maǵlıwmat ornında atap ótiw orınlı, búgingi kúnde Ájiniyaz atındaǵı Nókis mámleketlik pedagogikalıq institutında jámi 1 mıń 120 orınlıq studentler turaq jayları, qosımsha 100 orınlıq miymanxana kompleksi jańa oqıw jılına studentlerdi qabıllaw ushın tolıq tayar halǵa keltirildi.

Sonıń menen birge, isbilermenlik subyektleri menen mámleketlik-jeke sheriklik tiykarında 400 orınlıq studentler turaq jayı jańa oqıw jılına paydalanıwǵa tapsırılıwı jobalastırılǵan.

Sonday-aq, institut átirapındaǵı máhállelerden 214 ijara úyiniń sharayatları úyrenilip, jańa oqıw jılına tayarlap qoyılǵan.

NMPI baspasóz xızmeti.