Búgin, 4-sentyabr kúni Ájiniyaz atındaǵı Nókis mámleketlik pedagogikalıq institutında jańa 2023-2024-oqıw jılınıń ashılıwına baǵıshlanǵan ilaj bolıp ótti.

Oǵan baslanıp atırǵan oqıw jılında institutqa studentlikke qabıl etilgen jaslar, olardıń ata-anaları, professor-oqıtıwshılar, fakultet dekanları hám olardıń orınbasarları, tyutorlar, máhállelerdegi nuranıylar, keń jámiyetshilik hám ǵalaba xabar quralları wákilleri qatnastı.

Saltanatlı ilaj Ózbekstan hám Qaraqalpaqstan Respublikalarınıń mámleketlik gimnleri menen baslandı.

Ilajda institut rektorı wazıypasın waqıtsha atqarıwshı Quvondiq Qodirov sózge shıǵıp, 90 jılǵa shamalas tariyxı hám joqarı bilimlendiriw tarawında óz qádiriyatlarına iye bolǵan pedinstitut bosaǵasınan atlap, oqıwǵa qabıl etilgen studentlerdi qutlıqladı hám olardıń oqıwlarında tabıslar tiledi.

Bıyılǵı oqıw jılında Nókis mámleketlik pedagogikalıq institutı bakalavriatınıń kúndizgi, sırtqı hám keshki tálim baǵdarlarına, magistratura hám ekinshi qánigelik boyınsha dizimnen ótken talabanlar otız mıńnan aslamdı quraǵan bolsa, sonnan úsh yarım mıńǵa shamalas abiturient studentler qatarına qabıl etildi.

Institutta jańa oqıw jılına qızǵın tayarlıqlar kórildi. Auditoriyalar, laboratoriyalar, málimleme-resurs hám informaciyalıq texnologiyalar orayları, sport zalları hám maydanshaları oqıw procesine tolıq tayar halǵa keltirildi.

Ilajda professor Arzı Pazılov, Súwretlew óneri hám texnologiyalıq tálim fakultetiniń dekanı Janjayxan Dármenov, institutqa joqarı ball toplap oqıwǵa qabıl etilgen studentler, institut átirapındaǵı máhállelerdiń nuranıyları sózge shıǵıp, baslanıp atırǵan oqıw jılınıń hár jılǵıdan da tabıslı, áwmetli keliwine tileklesligin bildirdi.

– Instituttıń dene mádeniyatı tálim baǵdarına hújjet tapsırıp, kásiplik (dóretiwshilik) hám test imtixanlarınıń nátiyjelerine muwapıq 175 ball topladım hám mámleketlik grant tiykarında oqıwǵa qabıl etildim. Ata-anam hám ustazlarımnan sheksiz minnetdarman. Institutta oqıwdı basladıq. Aldaǵı waqıtlarda ustazlarımızdan bilim hám ilim sırların tereń meńgerip, úlken nátiyjelerge erisiwdi maqset etkenmen, – deydi institutqa eń joqarı ball menen kirgen Dinara Utemuratova.

Jańa oqıw jılı Ǵárezsizlik sabaqları menen dawam etpekte.

NMPI baspasóz xızmeti.