Búgin, 7-sentyabr kúni Ájiniyaz atındaǵı Nókis mámleketlik pedagogikalıq institutında Malayziyanıń Lincoln University College oqıw ornı menen birgelikte bakalavriattıń «60110200 – Mektepke shekemgi tálim» kúndizgi tálim baǵdarı boyınsha jolǵa qoyılǵan qospa tálim (Double Degree) baǵdarlamasında oqıp atırǵan studentler ushın tańlaw bolıp ótpekte.

«Pedagog kadrlar tayarlaytuǵın joqarı oqıw orınlarınıń qospa tálim baǵdarlamalarında oqıp atırǵan studentlerdiń birge islesiwshi sırt el joqarı oqıw ornındaǵı oqıw dáwiri ushın tólemli kontrakt muǵdarın mámleketlik byudjet qarjılarınan qaplap beriw tártibi haqqında»ǵı Ustavqa muwapıq ótkerilip atırǵan tańlawǵa institutta qospa tálim baǵdarlaması tiykarında oqıp atırǵan, tolıq oqıw dáwirinde oqıw semestrleri juwmaǵına bola ózlestiriw bahaları «5 (ayrıqsha)» hám «4 (jaqsı)», biraq ózlestiriw bahalarınıń keminde 50 procenti «5 (ayrıqsha)» bolǵan studentler qatnaspaqta.

Tańlaw sáwbet tárizinde ótkerilip, bunda hár bir talabanǵa tómendegi eki pán boyınsha sorawlar berilmekte:

– bakalavriat tálim baǵdarı boyınsha qánigelik páni – 50 ball;
– birge islesiwshi sırt el joqarı oqıw ornındaǵı bilimlendiriw tili boyınsha – 50 ball.

Bunda ulıwma toplaw múmkin bolǵan eń joqarı ball 100 balldı quraydı.

Birge islesiwshi sırt el joqarı oqıw ornındaǵı bilimlendiriw tilinen shet tilin biliw boyınsha tán alınǵan sertifikatqa (keminde B2) iye bolǵan talabanlar birge islesiwshi sırt el joqarı oqıw ornındaǵı bilimlendiriw tili boyınsha ótkeriletuǵın sáwbetten azat etiledi hám olarǵa maksimal ball beriledi.

Sáwbet nátiyjelerine bola, 71 ball hám onnan joqarı ball toplaǵan talabanlar jeńimpaz dep tabıladı hám tańlaw komissiyasınıń protokolı menen rásmiylestiriledi.

NMPI baspasóz xızmeti.