Búgin, 14-sentyabr kúni Ájiniyaz atındaǵı Nókis mámleketlik pedagogikalıq institutında Ózbekstan hám Qaraqalpaqstan Respublikalarınıń bilimlendiriw aǵlası, Greciya Xalıqaralıq akademiyası ilimiy orayınıń doktorı, Qaraqalpaqstan dene tárbiyası hám sport tarawında tuńǵısh ilim kandidatı hám professor, veteran ustaz Perdebay Shılmanovtıń 80 jıllıq yubileyine arnalǵan ilimiy-teoriyalıq konferenciya bolıp ótti.

Ilajdı institut rektorı wazıypasın waqıtsha atqarıwshısı Quvondiq Qodirov basqarıp bardı.

Konferenciyada Qaraqalpaqstan xalıq jazıwshısı, «Doslıq» ordeni iyesi, filologiya ilimleriniń kandidatı Allanazar Ábdiev «Pidayı pedagog hám belgili alım» atamasında bayanat jasadı.

Ilajda sózge shıqqanlar veteran ustazdıń miynet jolı hám qaraqalpaq dene tárbiyası jáne sportı tariyxındaǵı ornı girewli tulǵalardıń biri ekenligi haqqında ayta kelip, yubiley múnásibeti menen tayarlanǵan sawǵalardı tapsırdı.

Miynetkesh ilimpaz, pedagog, milliy sportımız jankúyeri bolǵan Perdebay Shılmanovtıń ómiri hám ilimiy-pedagogikalıq jumısları haqqında instituttıń dene tárbiyası kafedrası baslıǵı, professor A.Niyazov bayanat jasadı.

Qaraqalpaq mámleketlik pedagogikalıq institutı (házirgi Nókis mámleketlik pedagogikalıq institutı)nıń dene tárbiyası fakultetin tabıslı tamamlaǵan Perdebay Shılmanov dáslepki miynet jolın usı instituttan baslaǵan. 1974-1978-jılları Moskva qalasında aspiranturada oqıp, qaraqalpaq milliy sport oyınları temasında kandidatlıq dissertaciyasın jaqladı. Bunnan soń institutta óz miynet jolın dawam ettirdi. Qaraqalpaqstan dene tárbiyası hám sport tarawında birinshi ilim kandidatınıń nátiyjeli miynetleri esapqa alınıp, oǵan usı tarawdaǵı birinshi professorlıq dárejesi de berildi.

Sonı ayrıqsha atap ótiw kerek, Perdebay Shılmanovtıń ilimiy-izertlewleri nátiyjesinde qaraqalpaq xalqınıń 500 den aslam xalıq oyınları qayta tiklendi, olarǵa zamanǵa sáykes túrde qaǵıydalar kirgizip, mektep sharayatında balalardı fizikalıq jaqtan tárbiyalaw ushın baǵdarlamalar islep shıqtı. Ilimpazdıń avtorlıǵındaǵı «Milliy balalar oyınları» metodikalıq qollanbası hám baslawısh klass oqıwshıları ushın «Dene tárbiyası» sabaqlıǵı solar qatarına kiredi.

Perdebay Shılmanovtı «Qasharman top» oyınınıń jankúyeri sıpatında keń jámiyetshiligimiz oǵada húrmet penen tilge aladı. Ilimpaz 2006-jılı «Qaraqalpaqstan» baspasınan usı oyınnıń kelip shıǵıw tariyxı hám oynalıw qaǵıydaların óz ishine jámlegen «Qasharman top» kitabın baspadan shıǵarıp, keleshek áwladlar ushın teńsiz biybaha miyras dóretti.

Konferenciyada Qarakalpaqstan Respublikası Jaslar siyasatı hám sport ministri A.Allanazarov, Ózbekstan xalıq artisti, Berdaq atındaǵı mámleketlik sıylıqtıń laureatı, Ózbekstan Respublikasına miyneti sińgen jaslar ustazı N.Ańsatbaev, sonday-aq, ilimpazdıń shákirtleri, kásiplesleri, veteran ustazlar sózge shıǵıp, yubiley iyesine bekkem densawlıq, ilimiy-pedagogikalıq jumıslarına tabıs hám shańaraǵına qut-bereket tiledi.

Ilaj sońında veteran ustaz Perdebay Shılmanov shıǵıp sóylep, pedagogikalıq institut Qaraqalpaqstannıń barlıq zıyalı insanları ushın besik bolǵan ullı dárgay ekenligi hám bul jerde 60 jılǵa shamalas waqıt islep, usınday húrmet-izzetke bólenip atırǵanı ushın minnetdarshılıq bildirdi.

NMPI baspasóz xızmeti.