Búgin, 18-sentyabr kúni Ájiniyaz atındaǵı Nókis mámleketlik pedagogikalıq institutında bıyılǵı oqıw jılında studentlikke qabıl etilgen jaslardıń ata-anaları qatnasıwında forum shólkemlestirildi.

Ilaj institut studentleriniń oqıwda, jámiyetlik jumıslarda, sport jarısları hám pán olimpiadaları, xalıqaralıq hám respublikalıq tańlawlarda qolǵa kirgizgen tabısları sáwlelengen kórgizbe menen baslandı.

Forumǵa Fizika-matematika, Baslawısh tálim hám Pedagogika fakultetlerinde oqıp atırǵan student-jaslardıń ata-anaları, sonday-aq, instituttı pitkerip, búgingi kúnde mámleketimizdiń jámiyetlik-siyasiy, sociallıq-ekonomikalıq tarawlarında jemisli miynet etip atırǵan ustaz-pedagoglar, isbilermenler hám jámiyetlik ǵayratkerler qatnastı.

Ilajda instituttıń ilimiy-isler hám innovaciyalar boyınsha prorektorı R.Eshmuratov, jaslar máseleleri hám ruwxıy-aǵartıwshılıq bólimi baslıǵı B.Bekmuratov hám miymanlar sózge shıǵıp, házirgi waqıtta elimizde jaslardıń bilim alıwı, kásip-óner úyreniwi, aydın keleshegi ushın óz maqsetlerin ámelge asırıwı ushın islenip atırǵan jumıslar, tarawdaǵı reformalar haqqında maǵlıwmatlar berdi.

Sonday-aq, jaslardıń bos waqıtların mazmunlı ótkeriw, ilim, bilim sırların ózlestiriw, «ustaz-shákirt» sistemasında tájiriybeli professor-oqıtıwshılar menen birge islesiw sıyaqlı baǵdarlarda ámelge asırılıp atırǵan jumıslar jóninde atap ótti.

Forumda instituttıń «Tumaris» qosıq hám ayaq-oyın xalıq ansambli, sonday-aq, talantlı studentleriniń atqarıwındaǵı koncert baǵdarlaması qatnasıwshılarǵa bir dúnya ruwxıy zawıq baǵıshladı.

Institutta fakultetler boylap ata-analar forumı ilajları dawam etpekte.

NMPI baspasóz xızmeti.