Ájiniyaz atındaǵı Nókis mámleketlik pedagogikalıq institutında Ózbekstan jaslar awqamı baslanǵısh shólkeminiń ótken oqıw jılı dawamında alıp barǵan jumısların dodalaw, aldaǵı islenetuǵın jumıslardı belgilep alıwǵa baǵıshlanǵan esap beriw hám saylaw májilisi bolıp ótti. Ilaj baslanǵısh shólkem aǵzalarınıń jetiskenlikleri sáwlelengen kórgizbe menen baslandı.

Búgingi kúnde institutta 18 500 den aslam student oqıp atırǵan bolıp, sonnan 30 jasqa tolmaǵan 11 mıńnan aslam student-jaslar jaslar awqamınıń aǵzaları bolıp esaplanadı. Ótkerilgen májiliske olardan 200 delegat qatnastı.

Májiliske instituttıń jaslar máseleleri hám ruwxıy-aǵartıwshılıq bólimi baslıǵı Baxtıyar Bekmuratov basshılıq etti.

Kún tártibine muwapıq májiliste baslanǵısh shólkem tárepinen 2022-2023-oqıw jılında alıp barılǵan jumıslar, sonday-aq, jaslar awqamı institut baslanǵısh shólkeminiń jetekshisin saylaw máseleleri kórip shıǵılıwı belgilendi.

Atap ótilgen birinshi másele boyınsha institut jaslar jetekshisi Bayrambay Gúlimbetov maǵlıwmat berip ótken bolsa, kún tártibindegi tiykarǵı másele esaplanǵan jaslar awqamı institut baslanǵısh shólkemi jetekshiligine usınılǵan talabannıń ómirbayanı, miynet jolı hám aldaǵı jobaları haqqında maǵlıwmatlar berildi.

Májiliske qatnasıwshı delegatlar tárepinen dawıs beriw jolı arqalı institut jaslar jetekshiligine Gúlimbetov Bayrambay Dáwletbaevich saylandı.

Maǵlıwmat ornında atap ótiw kerek, B.Gúlimbetov 2010-jılı instituttıń bakalavriatura, 2018-jılı magistratura basqıshın pitkergen. 2010-2019-jıllar aralıǵında institutta bir qatar juwapkerli wazıypalardı atqarıp kelgen bolsa, 2019-jıldan berli instituttıń jaslar awqamı jetekshisi bolıp jumıs islemekte.

Májiliste delegatlar sózge shıǵıp, búgingi saylanǵan jaslar jetekshisine kelesi jumıslarında tabıslar tiledi.

NMPI baspasóz xızmeti.