Ájiniyaz atındaǵı Nókis mámleketlik pedagogikalıq institutında ullı oyshıl hám enciklopedist alım Ábiw Rayxan Beruniydiń 1050 jıllıǵı múnásibeti menen «Dáslepki renessans dáwiriniń ullı oyshılı» atamasındaǵı ilimiy-ámeliy konferenciya bolıp ótti.

Ilajdı instituttıń ilimiy isler hám innovaciyalar boyınsha prorektorı R.Eshmuratov kiris sóz benen ashtı hám basqarıp bardı.

Konferenciyanıń kún tártibine muwapıq, tariyx ilimleriniń doktorı, professor, Ózbekstanda demokratiyalıq processlerdi analizlew orayınıń Qaraqalpaqstan Respublikası aymaqlıq bólimi baslıǵı Ya.Abdullaeva Ábiw Rayxan Beruniyge tiyisli «Áyyemgi xalıqlardan qalǵan estelikler» shıǵarmasınıń sociallıq ilimler qáliplesiwindegi tariyxıy roli haqqında, fizika-matematika ilimleriniń doktorı, Matematikanı oqıtıw metodikası kafedrasınıń baslıǵı B.Prenov ullı oyshıl ál-Beruniydiń matematikalıq miyrasları haqqında, sonday-aq, biologiya ilimleri boyınsha filosofiya doktorı (PhD) B.Tleumuratova Ábiw Rayxan Beruniydiń «Saydana» shıǵarmasında keltirilgen dárilik ósimlikler haqqında bayanat jasadı.

Bunnan soń instituttıń bir qatar professor-oqıtıwshıları sózge shıǵıp, ullı oyshıl hám enciklopedist alımnıń ilimiy miynetleri, keleshek áwladqa qaldırǵan biybaha miyrasları jáne shıǵarmaları haqqında maǵlıwmat berdi.

Ilaj soraw-juwaplar menen dawam etti.

Bekbergen Ádilbaev,

NMPI Fizika-matematika fakultetiniń studenti.