Ájiniyaz atındaǵı Nókis mámleketlik pedagogikalıq institutında Botanika, ekologiya hám onı oqıtıw metodikası kafedrasınıń docenti, biologiya ilimleriniń kandidatı, kóplegen shákirtlerdiń ádiwli ustazı, kórnekli alım Muratbay Baltabaevtıń 70 jıllıǵına arnalǵan «Bilimlendiriw hám tábiyǵıy pánlerdiń jetiskenlikleri hám keleshek rejeleri» atamasındaǵı respublikalıq ilimiy-teoriyalıq konferenciya bolıp ótti.

Konferenciyanı institut rektorı wazıypasın waqıtsha atqarıwshısı Quvondiq Qodirov kiris sózi menen ashıp berdi hám yubiley iyesin institut jámááti atınan qutlıqladı.

Ilajda Tábiyǵıy pánler fakulteti dekanı Q.Reymov ilimpaz-pedagogtıń ómiri hám ilimiy-pedagogikalıq jumısları haqqında bayanat jasadı.

Muratbay Baltabaev 1953-jılı 26-sentyabrde Kegeyli rayonında tuwılǵan.

1980-jılı Nókis mámleketlik universitetiniń biologiya qánigeligin ayrıqsha bahalar menen pitkerdi.

Miynet jolı dawamında Nókis mámleketlik universitetiniń botanika kafedrasında kishi ilimiy xızmetker, oqıtıwshı, Tashkent mámleketlik agrar universitetiniń Nókis filialı sırtqı oqıw fakulteti dekanınıń orınbasarı, Qaraqalpaqstan Respublikası Tábiyattı qorǵaw boyınsha mámleketlik komiteti Respublikalıq Haywanatlar hám ósimlikler dúnyasın qorǵaw boyınsha inspekciya baslıǵı, Nókis qalalıq tábiyattı qorǵaw komiteti baslıǵı, 2002-jıl oktyabr ayınan baslap Ájiniyaz atındaǵı Nókis mámleketlik pedagogikalık institutı Tábiyattanıw hám geografiya fakulteti botanika kafedrasında dáslep assistent, keyin úlken oqıtıwshı, fakultet dekanınıń oqıw isleri boyınsha orınbasarı, kafedra docenti, baslıǵı lawazımında jumıs alıp bardı. 2017-jıldan usı waqıtqa shekem Botanika, ekologiya hám onı oqıtıw metodikası kafedrası docenti lawazımında jumıs atqarıp kelmekte.

Muratbay Baltabaev ustazlıq etiwden tısqarı ilimiy-izertlew jumısları menen shuǵıllanadı. 2010-jılı «Био-экологические особенности Crambe orientalis L. в условиях Южного Приаралья» degen temada kandidatlıq dissertaciya jumısın tabıslı jaqlap shıqtı.

Házirgi waqıtta Ájiniyaz atındaǵı Nókis mámleketlik pedagogikalıq institutınıń «Araldıń qurıǵan jerlerinde tábiyǵıy sharayatında hám introdukciyalanatuǵın Cinogossum viridiflorum Pall. ex lexm. hám Maloccarpus erithmifollus (Petz) C.A.Meu-diń agrotexnikacın islep shıǵıw» temasındaǵı 1 milliard sumlıq ilimiy joybarında jumıs alıp barmaqta.

Ilimiy-izertlew nátiyjelerin birneshe xalıqaralıq hám respublikalıq kólemdegi ilimiy konferenciya toplamları hám ilimiy jurnallarda járiyalap, usı kúnge shekem 133 ilimiy maqala hám tezisleri, sonnan 12 sırt el, 25 respublikalıq ilimiy jurnallarda, 96 respublikalıq hám xalıqaralıq konferenciyalarda, 5 oqıw qollanba, 5 oqıw metodikalıq qolanba hám 2 metodikalıq kórsetpeleri baspadan shıǵarıldı.

Ol búgingi kúnde intalı, ilimge, bilimge qushtar student-jaslardı ilimiy-izertlew jumıslarına baǵdarlawda úlken úlesin qosıp kelmekte. 2007-2008-oqıw jılında Biologiya hám insan tirishiligi iskerligin qorǵaw tálim baǵdarınıń studenti S.Aynazarova «Ulıǵbek» atındaǵı mámleketlik stipendiyasın, 2017-2018-oqıw jılında Biologiyanı oqıtıw metodikası tálim baǵdarınıń 4-kurs studenti S.Rajapova «Nawayı» atındaǵı mámleketlik stipendiyasın, 2020-2021-oqıw jılında Biologiyanı oqıtıw metodikası tálim baǵdarınıń 3-kurs studenti S.Qalbaeva «Ájiniyaz» atındaǵı stipendiyasın, 2021-2022-oqıw jılında Biologiyanı oqıtıw metodikası tálim baǵdarınıń 4-kurs studenti S.Qalbaeva «Nawayı» atındaǵı mámleketlik stipendiyasın hám 2022-2023-oqıw jılında Biologiya tálim baǵdarınıń 3-kurs studenti A.Jabbarbergenov «Ájiniyaz» atındaǵı stipendiyasın alıwǵa miyasar boldı.

Muratbay Baltabaev joqarı jetik kadrlar tayarlaw jumıslarına belsene qatnasıp kelmekte. Jaslarǵa ilim sırların erinbesten úyretedi, ilim-bilimniń jańa jetiskenlikleri haqqında shákirtlerine maǵlıwmatlar beredi, ilimdegi aktual mashqalalardı hám olardı sheshiw jolların kórsetedi. Házirgi kúnde shákirti Miyasar Qarlıbaeva biologiya ilimleri boyınsha filosofiya doktorı ilimiy dárejesin alıw ushın doktorlıq dissertaciyası ústinde jumıs alıp barmaqta.

M.Baltabaevtıń islegen pidákerlik miynetleri mámleketimiz hám húkimetimiz tárepinen múnásip bahalandı. 2004-jılı jaslarǵa tálim-tárbiya beriwdegi nátiyjeli miynetleri ushın Qaraqalpaqstan Respublikası Xalıq bilimlendiriw ministrliginiń húrmet jarlıǵı, 2006-jıl Qaraqalpaqstan Respublikası, 2013-jıl Ózbekstan Respublikası Xalıq bilimlendiriw aǵlası kókirek nıshanları, 2022-jıl Ózbekstan Respublikası Ǵárezsizliginiń 30 jıllıǵı kókirek nıshanı menen sıylıqlandı.

Konferenciyada Ándijan mámleketlik universitetiniń rektorı A.Yuldashev, Samarqand mámleketlik universiteti botanika kafedrasınıń baslıǵı X.Xaydarov yubiley iyesin qutlıqlap sózge shıqqan bolsa, Ózbekstan Ilimler Akademiyası Qaraqalpaqstan bólimi Qaraqalpaq tábiyǵıy pánler ilimiy-izertlew institutınıń direktorı, biologiya ilimleriniń doktorı, professor S.Mambetullaeva, Ózbekstan Ilimler Akademiyası Botanika institutı geobotanika laboratoriyasınıń baslıǵı, biologiya ilimleriniń doktorı B.Adilov búgingi kúnde tábiyattanıw ilimleriniń aldında turǵan áhmiyetli mashqalalarǵa baǵıshlanǵan ilimiy bayanatları menen shıǵıp sóyledi.

NMPI baspasóz xızmeti.