Ustaz, muǵallim, oqıtıwshı, pedagog – bul sózlerdi esitkende kewillerimiz ózgeshe tolqınlanıp, quwanıshqa bólenedi. Óytkeni, esimizdi tanıǵanımızdan berli usı insanlar biziń qolımızdan uslap, oqıwdı, jazıwdı úyretip, ómirge tayarlap, ózinde bar bilimlerdi, ómirlik tájiriybelerdi bizge úyretip kiyatırǵan ullı kásip iyeleri bolıp tabıladı.

Imaratlardıń ishinde eń ullısı mektep bolsa, kásiplerdiń ishinde eń ullısı hám maqtanıshlısı muǵallimshilik, ustazlıq, – degen edi danıshpanlardıń biri.

Usınday ullı kásip iyeleri búgin elimizde ózgeshe húrmet-izzetke bólenbekte.

Ájiniyaz atındaǵı Nókis mámleketlik pedagogikalıq institutında 1-oktyabr – Muǵallimler hám ustazlar kúni bayramı múnásibeti menen bayram ilajı shólkemlestirilip, taraw pidayıları ushın bayram dasturxanı jayıldı.

Ilajda institut rektorı wazıypasın waqıtsha atqarıwshısı Quvondiq Qodirov, Joqarı bilimlendiriw, ilim hám innovaciyalar ministrligi Qaraqalpaqstan Respublikası aymaqlıq basqarmasınıń baslıǵı Nursultan Kayupovlar sózge shıǵıp, barlıq professor-oqıtıwshılar, pedagog xızmetkerler hám ustazlardı kásiplik bayramı menen qutlıqladı.

Bayram keshesinde Joqarı bilimlendiriw, ilim hám innovaciyalar ministriniń buyrıǵı menen joqarı bilimlendiriw tarawında shın hújdanı menen jumıs alıp barıp, jas áwladtıń sapalı bilim alıwında óziniń pidayı miynetleri menen úlgi bolıp kiyatırǵan, sistemanıń rawajlanıwı ushın óziniń múnásip úlesin qosıp atırǵan institutımızdıń bir topar pidayı professor-oqıtıwshılarına «Joqarı bilimlendiriw aǵlası» kókirek belgisi saltanatlı túrde tapsırıldı.

Sonday-aq, Qaraqalpaqstan Respublikası Mektepke shekemgi hám mektep bilimlendiriw ministrligi tárepinen «Qaraqalpaqstan Respublikası Xalıq bilimlendiriw aǵlası» kókirek belgisi menen sıylıqlanǵan ustazlar, sonıń menen birge, tálim-tárbiya procesi, ilimiy-izertlew jumıslarında ayrıqsha belsendilik kórsetip kiyatırǵan pedagog xızmetkerlerge alǵısnamalar, húrmet jarlıqları tapsırıldı.

«Baqsha tárbiyashısı, mektep muǵallimi, professor-oqıtıwshılar hám ilimiy-dóretiwshi ziyalılarımızdı Oyanıw dáwiriniń tórt tayanısh sútini dep esaplaymız», – degen edi Prezident Shavkat Mirziyoev.

Solay eken, óz tarawınıń pidayı insanları bolǵan oqıtıwshı hám ustazlarǵa húrmet kórsetiw hár birimizdiń ádiwli wazıypamız bolıp tabıladı.

Bayram ilajı instituttıń muzıkalıq tálim baǵdarınıń talantlı student hám magistrantları atqarıwındaǵı koncert baǵdarlaması menen dawam etti.

Professor-oqıtıwshılar, pedagog xızmetkerler hám ustazlar bayram dasturxanı átirapında bir-biri menen sáwbetlesip, kóterińki keypiyatta bayramladı.

Institutta bayramǵa arnalǵan ilajlar dawam etpekte.

NMPI baspasóz xızmeti.