Áziz ustazlar! Qádirli muǵallimler hám professor-oqıtıwshılar!

Eń aldı menen, Sizlerdi, sizler arqalı ustaz degen ullı ataqqa erisip kiyatırǵan maqtanıshlı kásip iyelerin ulıwma xalıqlıq bayram – Muǵallimler hám ustazlar kúni menen shın júrekten qutlıqlaymız.

Ustaz, muǵallim, oqıtıwshı, pedagog – bul sózlerdi esitkende kewillerimiz ózgeshe tolqınlanıp, quwanıshqa bólenedi. Óytkeni, esimizdi tanıǵanımızdan berli usı insanlar biziń qolımızdan uslap, oqıwdı, jazıwdı úyretip, ómirge tayarlap, ózinde bar bilimlerdi, ómirlik tájiriybelerdi bizge úyretip kiyatırǵan ullı kásip iyeleri bolıp tabıladı.

Imaratlardıń ishinde eń ullısı mektep bolsa, kásiplerdiń ishinde eń ullısı hám maqtanıshlısı muǵallimshilik, ustazlıq, – degen edi danıshpanlardıń biri.

Usınday ullı kásip iyeleri búgin elimizde ózgeshe húrmet-izzetke bólenbekte.

Ómir bar eken, muǵallimshilik hám ustazlıq kásibi óziniń mazmunı hám húrmeti, áhmiyetin hesh qashan joǵaltpaydı.

Húrmetli Prezidentimiz Shavkat Mirziyoyevtiń «Sizlerdiń jaslarımızdıń júregi hám sanasına ana Watanǵa muhabbat hám sadıqlıq sezimin sińdiriw, olardı hár qıylı qáwiplerden qorǵaw, jetik insan etip tárbiyalaw jolındaǵı teńsiz xızmetlerińizdi barlıq ata-analar, keń jámiyetshilik, pútkil xalqımız jaqsı biledi hám joqarı dárejede qádirleydi», – dep aytıp ótkenindey, búgingi kúnde jámiyetimizde ustazlardı húrmetlew, olardıń abıroyın arttırıw baǵdarında ámelge asırılıp atırǵan jumıslar óz nátiyjesin bermekte.

Óytkeni, biz aldımızǵa Jańa Ózbekstan, sonıń ishinde, Jańa Qaraqalpaqstandı qurıwdı maqset etken ekenbiz, bunda mámlekettiń tiykarǵı súyenishi hám tayanıshı – bul, álbette, Sizler bolasız!

Qádirli ustazlar! Húrmetli professor-oqıtıwshılar!

Hámmeńizdi ulıwma xalıqlıq bayram menen jáne bir márte qutlıqlay otırıp, joqarı dárejeli hám juwapkershilikli jumıslarıńızda kúsh-ǵayrat, joqarı nátiyje, shańaraqlarıńızǵa amanlıq, ırısqı-nesiybe tileymiz!

Ájiniyaz atındaǵı Nókis mámleketlik pedagogikalıq institutı rektoratı.