Ájiniyaz atındaǵı Nókis mámleketlik pedagogikalıq institutında Ózbekstan Respublikası Prezidenti janındaǵı Mámleketlik xızmetti rawajlandırıw agentliginiń Qaraqalpaqstan Respublikası filialı tárepinen Ózbekstan Respublikası Prezidentiniń «Mámleketlik xızmetkerler hám qánigelerdi sırt ellerde tayarlaw jáne olardıń potencialın bunnan bılay da arttırıw sistemasın túp-tiykarınan jetilistiriw ilajları haqqında»ǵı pármanınıń mazmunı hám áhmiyeti, sonday-aq, «El-yurt umidi» qorınıń ashıq stipendiya tańlawları tártibin túsindiriw hám úgit-násiyatlawǵa baǵıshlanǵan seminar shólkemlestirildi.

Ilajǵa ministrlik, mákeme hám shólkemlerdiń jas xızmetkerleri, joqarı oqıw orınlarınıń doktorant, magistrant hám student-jasları, Qaraqalpaqstan Respublikası «Keleshek liderleri» klubınıń aǵzaları qatnastı.

Seminarda Mámleketlik xızmetti rawajlandırıw agentliginiń Qaraqalpaqstan Respublikası filialı direktorınıń orınbasarı A.Reyimbaev, «El-yurt umidi» qorı qarjıları esabınan sırt ellerdegi abıroylı joqarı oqıw orınlarında magistratura baǵdarlamaları arqalı bilim alıp, búgingi kúnde mámleketimizdiń xalıq xojalıǵı tarawlarında jumıs alıp barıp atırǵan stipendiatlar G.Godarova, U.Kamalov, B.Uzaqbaevalar sózge shıǵıp, qor tárepinen jaslarǵa ajıratılıp atırǵan sırt el grantlarınıń áhmiyeti haqqında maǵlıwmatlar berip, qor stipendiyasın jeńip alıw boyınsha óz tájiriybeleri menen bólisti.

Seminardı shólkemlestiriwden tiykarǵı maqset qábiletli hám potenciallı jas qánigeler jáne student-jaslardı «El-yurt umidi» qorınıń bilimlendiriw baǵdarlamaları tiykarında sırt ellerdegi abıroylı bilimlendiriw hám ilimiy-izertlew oraylarında oqıwına kómeklesiw, professional, tereń bilimge iye, zamanagóy pikirleytuǵın hám watan súyiwshilik ruwxında tárbiyalanǵan jańa áwlad kadrların qáliplestiriw hám olardı mámleketlik xızmetke tartıwdan ibarat.

Ilajda qatnasıwshılar sırt el bilimlendiriw baǵdarlamaları boyınsha ózlerin qızıqtırǵan sorawlarǵa juwaplar aldı.

NMPI baspasóz xızmeti.