Ájiniyaz atındaǵı Nókis mámleketlik pedagogikalıq institutı Pedagogika fakultetinde «Biz – radikalizm hám ekstremizmge qarsımız!» atamasında tiyisli taraw wákilleri qatnasıwında profilaktikalıq úgit-násiyat ushırasıwı bolıp ótti.

Ilajda Qaraqalpaqstan Respublikası Ishki isler ministrligi Operativ-izlew xızmeti Terrorizmge qarsı gúresiw basqarmasınıń xızmetkeri, podpolkovnik K.Allambergenov, Muhammed ibn Ahmed ál-Beruniy atındaǵı orta arnawlı islam oqıw ornı oqıtıwshısı J.Ishaev, instituttıń profilaktikalıq inspektorı, kapitan B.Masharipov sózge shıǵıp, kún tártibindegi másele boyınsha studentlerge tolıq maǵlıwmatlar berdi.

Atap ótilgenindey, házirgi kúndegi globallasıw sharayatında, sonday-aq, xalıqaralıq yamasa regionallıq kólemde júzege kelip atırǵan qarama-qarsılıqlar hám kelispewshilikler bolǵan jaǵdayda ekstremizm, radikalizm hám terrorizm sıyaqlı buzǵınshı ideyalarǵa qarsı gúresiw máselesi kún tártibindegi áhmiyetli máseleler qatarına kirmekte. Buǵan ekstremistlik hám radikal ideyalar tásirine túsip qalıp atırǵan adamlardıń kópshiligin jaslar qurap atırǵanlıǵı jáne olardıń san jaǵınan artıp baratırǵanın sebep sıpatında kórsetiw múmkin.

Búgingi kúnde ekstremizm hám terrorizm sıyaqlı buzǵınshı ideyalardı jaqlaytuǵın toparlar hám shólkemlerdiń aǵzaları tárepinen zamanagóy informaciyalıq qurallardan paydalanıp, din nıqabı astında jaslarımızdı zorlıqqa, milliy ózlik hám shańaraqlıq qádiriyatlardı joq etiwge baǵdarlaw háreketleri menen jámiyette kelispewshilik, buzǵınshılıq hám radikal kózqaraslardıń tarqalıwı háreketleri dawam etip atırǵanlıǵın baqlaw múmkin. Bunday háreketlerdiń túp-tiykarında bolsa terrorshı shólkemlerdiń óz qatarın ele de keńeytiw maqsetleri bar ekenligi ayqın kórinbekte.

Sonlıqtan, muqaddes dinimizde qaralanǵan, qádiriyatlarımızǵa qayshı keletuǵın hám dástúrlerimiz qabıl etpeytuǵın radikalizm, ekstremizm hám terrorizm sıyaqlı illetlerden jaslarımızdı qorǵaw, olardıń tarqalıwına xızmet etip atırǵan hár qanday háreketlerdiń aldın alıw boyınsha ámelge asırılatuǵın is-ilajlardı belgilew, bul baǵdarda milliy hám xalıqaralıq tájiriybelerden paydalanıw mámleketimiz siyasatınıń baslı baǵdarlarınıń biri bolıp esaplanadı.

Ilajda sózge shıqqanlar jaslar menen birgelikte alıp barılatuǵın úgit-násiyat jumıslarına toqtalıp, olardıń qızıqtırǵan sorawlarına tolıq juwap berdi.

NMPI baspasóz xızmeti.