Ájiniyaz atındaǵı Nókis mámleketlik pedagogikalıq institutında Korrupciyaǵa qarsı gúresiw «Komplaens-qadaǵalaw» sistemasın basqarıw bólimi tárepinen 2023-2024-oqıw jılında jumısqa qabıl etilgen professor-oqıtıwshılar menen ushırasıw bolıp ótti.

Ushırasıwda antikorrupciya bóliminiń baslıǵı P.Xojabekov korrupciyaǵa qarsı gúresiwge baylanıslı shıǵarılǵan normativ-huqıqıy hújjetler, pármanlar hám qararlar haqqında professor-oqıtıwshılarǵa maǵlıwmatlar berip, bólim ashılǵannan usı kúnge shekemgi bólimniń jumısı, jetiskenlikleri, bólimniń isenim telefonları hám Telegram botı úzliksiz islep turǵanlıǵı haqqında sóz etti.

Ilaj dawamında student-jaslardıń sanasına korrupciyanıń jaman illet ekenligi, oǵan jol qoymawı kerekligi haqqındaǵı úgit-násiyatlaw jumısların alıp barıwda bólim xızmetkerleriniń ǵana emes, sonıń menen bir qatarda, professor-oqıtıwshılardıń da ornı úlken ekenligi atap ótildi.

Ushırasıw pikir almasıwlarǵa bay bolıp, professor-oqıtıwshılar taraw boyınsha ózlerin qızıqtırǵan sorawlarǵa juwaplar aldı.

Antikorrupciya bólimi baslıǵı P.Xojabekov professor-oqıtıwshılardı korrupciyaǵa qarsı gúresiwde sergeklikke hám birgelikte jámiyetlik qadaǵalawdı ámelge asırıwǵa shaqırdı.