Aldın xabar bergenimizdey, usı jıldıń 20-22-oktyabr kúnleri Tashkent qalasında regbi-7 boyınsha 2005-2007-jıllarda tuwılǵan erler hám qızlar saylandı komandaları arasında U-18 Ózbekstan kubogi, sonday-aq, 2003-2005-jıllarda tuwılǵan erler hám qızlar saylandı komandaları arasında U-20 Ózbekstan kubogi jarısları bolıp ótti.

Oǵan Tashkent qalası, wálayatlar hám Qaraqalpaqstan Respublikasınan saylandı komandalar qatnastı.

Jarısta 2005-2007-jıllarda tuwılǵan qızlar saylandı komandamız barlıq qarsılasların jeńip shıǵıp, U-18 Ózbekstan kubogi jeńimpazı bolǵan bolsa, 2003-2005-jıllarda tuwılǵan qızlar saylandı komandamız U-20 Ózbekstan kubogi jarısında sıylı 2-orındı iyeledi.

Respublikamızdıń U-18 saylandı komandası quramında Ájiniyaz atındaǵı Nókis mámleketlik pedagogikalıq institutı Dene mádeniyatı fakultetiniń studentleri S.Sabirova, Sh.Jalalova, D.Utemuratova, N.Amangeldieva, Ú.Uteshovalar múnásip qatnasıp, jeńiske óz úleslerin qosqan bolsa, U-20 saylandı komanda quramında instituttan A.Shamshetova, M.Amatova, G.Perjanova ózleriniń joqarı sport sheberlikleri menen joqarı nátiyjeni qolǵa kirgiziwge tiykar jarattı.

Búgin, 24-oktyabr kúni Nókis temir jol vokzalında jeńimpazlar institut rektoratı, fakultet jámááti, keń jámiyetshilik hám ǵalaba xabar quralları wákilleri qatnasıwında kútip alındı.

Ilajda sózge shıqqanlar sportshılardıń ájayıp tabısları menen qutlıqlap, aldaǵı jarıslarda áwmet tiledi.

Esletip ótemiz, sportshılardı jarısqa Anton Mixaylov hám Jetkerbay Bazarovlar tayarladı.

NMPI baspasóz xızmeti.