Aldın xabar bergenimizdey, Ájiniyaz atındaǵı Nókis mámleketlik pedagogikalıq institutında barlıq fakultetler kesiminde korrupciyaǵa qarsı gúresiw «Komplaens-qadaǵalaw» sistemasın basqarıw bólimi tárepinen «Biz – korrupciyaǵa qarsımız!» atamasında úgit-násiyat ilajları alıp barılmaqta.

Súwretlew óneri hám texnologiyalıq tálim, Tariyx, Tábiyǵıy pánler hám Ellikqala pedagogika fakultetlerinde 1-kurs studentleri qatnasıwında ótkerilgen ushırasıwlarda bólim baslıǵı P.Xojabekov hám tiyisli juwapkerler korrupciyaǵa qarsı gúresiwge baylanıslı normativ-huqıqıy hújjetler, pármanlar hám qararlar haqqında student-jaslarǵa maǵlıwmatlar berdi.

Bólim tárepinen ámelge asırılıp atırǵan jumısları haqqında sóz etip, bólimniń Telegram botı hám isenim telefonları menen tanıstırdı.

Jaslardı korrupciyaǵa qarsı birgelikte gúresiwge, jámiyetlik qadaǵalawdı ámelge asırıwǵa shaqırdı. Sonıń menen birge, bólimniń «Korrupciyaǵa qarsı gúresiw student-jaslar klubı» haqqında maǵlıwmat berip, studentlerdi aǵza bolıwǵa shaqırdı.

Studentlerge institutta «9-dekabr – Xalıqaralıq korrupciyaǵa qarsı gúresiw kúni»ne baǵıshlap ótkeriletuǵın tańlawlarǵa, ilajlarǵa házirden baslap puqta tayarlıq kóriw hám ótken jılǵı tańlaw nátiyjeleri boyınsha fakultetlerdiń jetiskenlikleri haqqında aytıp, 1-noyabr kúnine shekem tańlawǵa materiallar qabıl etiletuǵınlıǵı atap ótildi hám fakultetlerdiń juwapkerlerine tiyisli tapsırmalar berildi.

Úgit-násiyat ilajları dawamında studentler ózlerin qızıqtırǵan sorawlarına juwaplar alıp, óz pikirleri menen bólisti.