Usı jıldıń 29-oktyabr kúni respublikamızdıń rus ádebiyattanıw tarawında óziniń múnásip ornına iye pidayı ustaz hám jankúyer ilimpaz, filologiya ilimleriniń kandidatı, Ájiniyaz atındaǵı Nókis mámleketlik pedagogikalıq institutı rus tili hám ádebiyatı kafedrasınıń docenti, belgili jurnalist, Ózbekstan hám Qaraqalpaqstan xalıq bilimlendiriw aǵlası Zulfiya Shamuratova dúnyadan ótti.

Búgingi kúnge shekem Zulfiya Shamuratova institutta student-jaslarǵa tálim-tárbiya beriwde jemisli miynet etti.

Zulfiya Shamuratova 1952-jılı Nókis qalasında belgili jazıwshı, shayır, dramaturg, dilmash Ámet Shamuratov hám xalqımızǵa belgili, xalıq qosıqları atqarıwshısı, teatr, estrada artisti, Qarakalpaqstan hám Ózbekstanda birinshi bolıp burınǵı Awqam xalıq artisti bolǵan Ayımxan Shamuratovalar shańaraǵında tuwılǵan.

Ol M.V.Lomonosov atındaǵı Moskva mámleketlik universiteti ilimiy-metodikalıq toplamlarında «M.Gorkiydiń «Balalıq» gúrrińleriniń túrkiy tillerdegi awdarmaları» (XX-XXI ásir rus adebiyatı toplamı), teoriya hám metodologiyanı úyreniw mashqalaları toplamında «M.Sholoxovtıń ádebiy dúnyası túrkiy awdarmalarda», «Qaraqalpaqstan rus jazıwshılarınıń tvorchestvosı» hám basqa da kóplegen maqalaları basıp shıǵarıldı.

Shet tilleri fakultetinde ótkerilgen ilimiy konferenciyalarǵa kelip túsken maqalalardı redaktorlawda Zulfiya Shamuratovanıń miyneti kóp edi.

Zulfiya Shamuratova respublikamızda belgili «Вести Каракалпакстана» gazetasınıń jurnalisti sıpatında kóplegen recenziyalar, pikirler, publikaciyalar avtorı edi. Ol «Возвращение дервиша», «Iskusstvo ómirim», «Sheberliktiń shıńına qaray» kitaplarına óz recenziya hám pikirlerin jazǵan edi.

Qaraqalpaq jazıwshı hám shayırları T.Jumamuratov, I.Yusupov, A.Shamuratov, ádebiyatshı M.Nurmuhammedov dóretiwshiligi boyınsha kóp izleniwler alıp barıp, olarǵa baǵıshlap iri monografiyalar basıp shıǵardı.

Ájiniyaz atındaǵı Nókis mámleketlik pedagogikalıq institutı rektoratı hám miynet jámááti, Shet tilleri fakulteti, rus tili hám ádebiyatı kafedrası professor-oqıtıwshıları jáne studentleri marhumnıń jaqınları hám aǵayin-tuwısqanlarına tereń qayǵırıw menen kewil bildiredi.

Xalqımız iygiligi ushın ayanbay miynet etken qádirli insan, belgili jazıwshı, omırawlı ilimpazdıń esteligi bárshemizdiń yadımızda uzaq saqlanıp qaladı.