Aldın xabar bergenimizdey, búgin, 2-noyabr kúni Qaraqalpaqstan Respublikası Futbol Associaciyasınıń stadionında futbol boyınsha 30-Qaraqalpaqstan chempionatı Kushmag 2-ligasınıń final oyını bolıp ótti.

Finalda Ájiniyaz atındaǵı Nókis mámleketlik pedagogikalıq institutınıń «NMPI» komandası Xojeli rayonınıń «Xoja-eli» komandası menen jeńimpazlıq ushın maydanǵa tústi.

Oyınnıń dáslepki bólimin 2:1 esabında juwmaqlaǵan institutımız komandası ekinshi bólimde tájiriybeli qarsılaslarına imkaniyattı berip qoydı hám oyın juwmaǵında 2:5 esabında jeńiliske ushıradı.

Solay etip, Ájiniyaz atındaǵı Nókis mámleketlik pedagogikalıq institutınıń «NMPI» komandası futbol boyınsha 30-Qaraqalpaqstan chempionatı Kushmag 2-ligasınıń gúmis medalına iyelik etti.

«NMPI» komandası sárdarı Miyras Qarlıbaev «Eń jaqsı oyınshı» nominaciyası jeńimpazı dep tabıldı.

NMPI baspasóz xızmeti.