Ájiniyaz atındaǵı Nókis mámleketlik pedagogikalıq institutında 1-30-noyabr kúnleri aralıǵında «Quramında náshebentlik, psixotrop hám kúshli tásir etiwshi elementler bolǵan dári preparatlarınıń nızamǵa qayshı aylanısına qarsı gúresiw» operativ profilaktikalıq ilajın ótkeriw boyınsha jumısshı topar tárepinen student-jaslar arasında úgit-násiyat jumısları alıp barıldı.

Ilajda Ózbekstan Respublikası Ishki isler ministrligi Jınayat-izlew departamenti Jınayat-izlew xızmeti basqarma baslıǵınıń orınbasarı A.Matlyubov, Jınayat-izlew xızmeti ayrıqsha isler boyınsha operativ wákilleri F.Azgarov, A.Aljanov, Qaraqalpaqstan Respublikası Ishki isler ministrligi Jınayat-izlew basqarması baslıǵınıń orınbasarı N.Abdullaev jaslar menen sáwbetlesiw tárizinde úgit-násiyat alıp bardı.

Taraw wákilleri tárepinen atap ótilgenindey, elimizde jınayatshılıqqa qarsı gúresiw hám huqıqbuzarlıqlardıń aldın alıw baǵdarındaǵı jumıslardı muwapıqlastırıw, xalıqtıń huqıqıy mádeniyatı hám sanasın jetilistiriw, bul baǵdarda mámleketlik strukturalardıń bilimlendiriw mákemeleri, puqaralıq jámiyetiniń institutları, ǵalaba xabar quralları menen óz ara nátiyjeli birge islesiwin shólkemlestiriw menen baylanıslı anıq wazıypalar belgilengen bolıp, Jınayat kodeksiniń 270-276-statyaları menen náshebentlik zatlar, olardıń analogları hám psixotrop zatlardı nızamǵa qayshı túrde paydalanıw ushın jınayıy juwapkershilik belgilengen. BMShnıń maǵlıwmatlarına bola, náshebentlik awır hám oǵada awır jınayatlardıń júz beriwine, shańaraqlar hám millet genofondınıń buzılıwına sebepshi bolmaqta.

Ilajda qánigeler jaslardıń pikir-usınısların tıńlap, sorawlarına juwap berdi.

Ilaj sońında náshebentlik hám psixotrop zatlardıń unamsız aqıbetleri haqqında sóz etetuǵın videorolik studentlerdiń názerine usınıldı.

NMPI baspasóz xızmeti.