Elimiz boylap «Jasıl mákan» ulıwma milliy joybarı sheńberinde hár qıylı ekologiyalıq akciyalar, abadanlastırıw hám kóklemzarlastırıw jumısları qızǵın pátlerde dawam etpekte.

Ájiniyaz atındaǵı Nókis mámleketlik pedagogikalıq institutı miynet jámááti hám student-jasları Prezidentimizdiń baslaması menen usı jıldıń 25-oktyabr – 1-dekabr kúnleri aralıǵında dawam etiwi belgilengen «gúzgi terek egiw máwsimi»nde ózleriniń ayrıqsha belsendiligin kórsetpekte.

Búgin, 14-noyabr kúni instituttıń Fizika-matematika fakulteti jámááti hám studentleri, sonday-aq, jaslar awqamı baslanǵısh shólkemi jetekshileri, koordinatorları, studentler keńesi belsendileri instituttıń dala oqıw-ámeliyatı mandanshasında bos jerlerge 2 mıńǵa shamalas hár qıylı dekorativ hám miywe terek nállerin otırǵızdı.

– Institutımız jámááti joybar sheńberinde hár kúni abadanlastırıw hám kóklemzarlastırıw jumısların alıp barmaqta. Maqsetimiz – qorshaǵan ortalıqtı jasıllandırıw hám jasap atırǵan aymaǵımızda ekologiyalıq turaqlılıqtı támiyinlew. Bul baǵdardaǵı jumıslarımız ele dawam etedi, – deydi Fizika-matematika fakulteti dekanınıń orınbasarı Xalmurat Esemuratov.

Maǵlıwmat ornında atap ótiw kerek, Ájiniyaz atındaǵı Nókis mámleketlik pedagogikalıq institutı bıyılǵı «Jasıl mákan» ulıwma milliy joybarı hám «gúzgi terek egiw máwsimi»nde 20 mıńǵa shamalas terek nállerin otırǵızıwdı maqset etken.

NMPI baspasóz xızmeti.