Ájiniyaz atındaǵı Nókis mámleketlik pedagogikalıq institutı Mektepke shekemgi tálim fakultetinde 14-noyabr – Xalıqaralıq logopedler kúnine arnalǵan bayram keshesi bolıp ótti.

Ilajda fakultet dekanı M.Allambergenova sózge shıǵıp, búgingi bayram menen barlıq taraw qánigelerin, professor-oqıtıwshılar hám bolajaq logoped studentlerdi qutlıqladı.

Institutta arnawlı pedagogika: logopediya bakalavr tálim baǵdarı boyınsha 2014-jıldan berli bilimlendiriw mákemelerine jetik qánigeler tayarlanıp kelinbekte. Olarǵa joqarı dárejeli ilimiy-pedagogikalıq tájiriybege iye bolǵan professor-oqıtıwshılar tálim-tárbiya berip kelmekte. Usı kúnge shekem fakultette birneshe mıńlaǵan kadrlar tayarlanǵan bolsa, búgingi kúnde olar mámleketimizdiń bilimlendiriw hám densawlıqtı saqlaw tarawlarında jemisli miynet etpekte.

Institutta logopediya tálim baǵdarı ashılǵan jılı 70 abiturient oqıwǵa qabıllanǵan bolsa, bıyılǵı oqıw jılında olardıń sanı 230 dan artıp ketti. Álbette, bul taraw qánigelerine bolǵan zárúrlikten kelip shıqpaqta.

Atap ótilgenindey, sóylewinde kemshiligi bolǵan balalar menen islesetuǵın logopediya búgingi turmısımızdıń eń zárúr kásipleriniń biri bolıp esaplanadı. Balalıq dáwirdegi sóylewdiń buzılıwına itibarsız qaraw sóylewdegi bir ómirlik kemshiliklerge sebepshi bolıwı múmkin. Kemshiliklerdi durıs hám nátiyjeli usıllar menen saplastırıw bolsa logopedlerdiń tiykarǵı wazıypası bolıp tabıladı.

Bayram keshesinde fakultettiń talantlı studentleri atqarıwındaǵı koncert baǵdarlaması qatnasıwshılar názerine usınılıp, olar arasın qızıqlı viktorina oyınları shólkemlestirildi.

NMPI baspasóz xızmeti.