Búgingi kúnde Ájiniyaz atındaǵı Nókis mámleketlik pedagogikalıq institutında 19 mıńǵa shamalas student-jaslar bilim almaqta. Bilimlendiriw 5 tilde alıp barılatuǵın bul ullı dárgayda qaraqalpaq, ózbek, qazaq, túrkmen, rus, koreys, qırǵız, ázerbayjan, bashqurt, uyǵır hám tatar sıyaqlı ulıwma 11 milletke tiyisli studentler bir shańaraqtıń perzentlerindey, awızbirshilikte oqıp atır.

16-noyabr – Xalıqaralıq keńpeyillik kúni hám «Biz – bir shańaraq perzentlerimiz!» súreni tiykarında ótkerilip atırǵan «Keńpeyillik hápteligi» sheńberinde institutta milletler aralıq tatıwlıq, doslıq hám awızbirshiliktiń áhmiyetin jaslar arasında keńnen úgit-násiyatlaw maqsetinde «Ózbekstan – ulıwma úyimiz» atamasında bayram keshesi bolıp ótti.

Ilajda institut rektorı wazıypasın waqıtsha atqarıwshısı Q.Qodirov tárepinen atap ótilgenindey, búgingi kúnde elimizde bir júz otızdan aslam millet hám xalıqlardıń wákilleri bir shańaraqtıń perzentlerindey tatıwlıqta, awızbirshilikte jasap, túrli tarawlarda nátiyjeli miynet etpekte. Barlıq millet hám xalıqlardıń tili, mádeniyatı, úrp-ádet hám dástúrlerin saqlaw jáne rawajlandırıw ushın barlıq sharayatlar jaratılǵan. Mámleketimiz tárepinen hár qıylı milletler arasında óz ara miyrim-shápáátti bunnan bılay da bekkemlewge ayrıqsha itibar qaratılmaqta.

Sózge shıqqanlar búgingidey globallasıw sharayatında kóplegen mámleketlerde júz berip atırǵan milliy, diniy hám etnikalıq kelispewshilikler jaǵdayında biziń elimizde hár qıylı millet wákilleriniń tınısh-tatıw, abadan turmısta ómir súriwi elimizde alıp barılıp atırǵan usı baǵdardaǵı durıs siyasattıń nátiyjesi bolıp esaplanatuǵınlıǵına ayrıqsha toqtaldı.

Ilaj instituttıń «Tumaris» ansambli hám talantlı studentleri atqarıwındaǵı bayram koncerti menen dawam etti.

NMPI baspasóz xızmeti.