Ájiniyaz atındaǵı Nókis mámleketlik pedagogikalıq institutı rektorınıń hayal-qızlar máseleleri boyınsha másláhátshisi S.Bekchanova baslaması menen «Biz – zorlıqqa qarsımız!» súreni tiykarında úgit-násiyat ilajı shólkemlestirildi.

Ilajǵa Qaraqalpaqstan Respublikası Reabilitaciya orayı yuristi B.Arzieva, usı oraydıń qánigesi I.Esenova, instituttıń hayal-qızlar máseleleri boyınsha profilaktikalıq inspektorı, leytenant M.Narımbetova, psixologiya kafedrasınıń docenti M.Jolımbetova, fakultet dekanlarınıń másláhátshileri, tyutorlar hám studentler qatnastı.

Atap ótilgenindey, BMSh Bas Assambleyasınıń 1999-jıl 17-dekabrdegi rezolyuciyasına muwapıq 25-noyabr – Xalıqaralıq hayal-qızlarǵa qollanılatuǵın zorlıqqa qarsı gúresiw kúni dep járiyalanǵan. 2014-jıldan baslap hár jılı dúnya júzinde 25-noyabrden 10-dekabrge shekem «Zorlıqqa qarsı 16 kún» súreni tiykarında ilajlar shólkemlestiriledi.

Ilajda Prezidentimiz basshılıǵında ámelge asırılıp atırǵan reformalar procesinde hayal-qızlardıń jámiyetlik-siyasiy belsendiligin arttırıw, ilim tarawında izleniw alıp barıp atırǵan hayal-qızlardı hár tárepleme qollap-quwatlaw, jas ilimpaz qızlardıń tájiriybesin ǵalabalastırıw baǵdarındaǵı jumıslar haqqında pikirlesiwler bolıp ótti.