Birlesken Milletler Shólkemi Bas Assambleyasınıń 1992-jıl 14-oktyabrdegi rezolyuciyasına muwapıq hár jılı 3-dekabr sánesi dúnya boylap Xalıqaralıq mayıplar kúni sıpatında belgilenip kelinbekte. Bunnan tiykarǵı maqset – mayıplıǵı bolǵan adamlardıń huqıqların jámiyetlik turmıstıń barlıq tarawlarında qorǵaw, olardıń mashqalalarına keń jámiyetshiliktiń itibarın qaratıwdan ibarat.

Jaqsılıq, miyrim-shápáát hám adamgershiliktiń simvolı esaplanǵan usı bayramda Ájiniyaz atındaǵı Nókis mámleketlik pedagogikalıq institutında jumıs isleytuǵın hám oqıp bilim alıp atırǵan mayıplıǵı bolǵan adamlar da itibardan shette qalmadı.

Institut rektorı wazıypasın waqıtsha atqarıwshısı Q.Qodirov, kásiplik awqamı komiteti baslıǵı K.Gúlimbetov hám tiyisli juwapkerler qatnasıwında ótkerilgen ushırasıwda 200 ge shamalas xızmetker hám student-jaslarǵa bayram sawǵaları tapsırıldı.

Studentler menen sáwbetlesiwler ótkerilip, olardıń pikir-usınısları, múrájatları tıńlandı hám tiyisli tártipte úyrenip shıǵıw ushın juwapkerlerge tapsırmalar berildi.

Óz gezeginde, xızmetkerler hám studentler institut rektoratı hám kásiplik awqamı komitetine kórsetilip atırǵan itibar hám ǵamqorlıqlar ushın minnetdarshılıǵın bildirdi.

Institutta bayramǵa arnalǵan ilajlar dawam etpekte.

NMPI baspasóz xızmeti.