Qaraqalpaq ádebiyatınıń klassikalıq wákili, «Sazın samal yadlap, sózin el bilgen» dilwar shayır Ájiniyaz Qosıbay ulınıń 200 jıllıǵı aldınan respublikamızda kóplegen mádeniy-aǵartıwshılıq ilajları shólkemlestirilmekte.

Búgin, 5-dekabr kúni Ájiniyaz atındaǵı Nókis mámleketlik pedagogikalıq institutında Ózbekstan mámleketlik konservatoriyası Nókis filialı menen birgelikte shayırdıń 200 jıllıǵı múnásibeti menen «Renessans hám jaslar» atamasındaǵı koncert baǵdarlaması bolıp ótti.

Ilajda institut rektorı wazıypasın waqıtsha atqarıwshısı Quvondiq Qodirov hám konservatoriyanıń Nókis filialı direktorı Rudakiy Allanbaev sózge shıǵıp, qaraqalpaq ádebiyatınıń klassikalıq shayırı Ájiniyaz Qosıbay ulınıń shıǵıs xalıqları mádeniyatı hám ádebiyatın, xalıqlar arasındaǵı doslıq qatnasıqların rawajlandırıwǵa, sonıń menen birge, jas áwladtı watan súyiwshilik hám xalıqshıllıq ruwxında tárbiyalawǵa qosqan úlken úlesi haqqında aytıp ótti. Onıń tákirarlanbas ádebiy miyrasın xalqımız arasında ele de keń en jaydırıw maqsetinde ámelge asırılıp atırǵan jumıslardıń áhmiyeti haqqında maǵlıwmatlar berdi.

Atap ótiw orınlı, Ózbekstan Respublikası Ministrler Kabinetiniń qararı tiykarında 2024-jılı Ájiniyaz Qosıbay ulı tuwılǵanınıń 200 jıllıǵı respublikamız kóleminde keń túrde belgileniwi jobalastırılmaqta.

Koncert baǵdarlamasında «Shuhrat» medalınıń iyesi, Qaraqalpaqstanǵa miyneti sińgen jaslar ustazı, professor Hikmat Rajabov basshılıǵındaǵı filialdıń xalıq sazları orkestri tárepinen Ájiniyaz shayırdıń qáleminen dórelgen qosıqlar atqarıldı.

Tamashagóyler «Bozataw», «Bir janan», «Gózzallar», «Aman ba?», «Bir páriy», «Kelip ket», «Ellerim bardı», «Kózlerim», «Jaqsı» sıyaqlı janlı atqarıwdaǵı qosıqlardı tıńlap, mádeniy dem aldı.

Ilaj sońında Quvondiq Qodirov Ózbekstan mámleketlik konservatoriyası Nókis filialı jámááti, xalıq sazları orkestri aǵzalarına tereń minnetdarshılıq bildirdi.

NMPI baspasóz xızmeti.