Ájiniyaz atındaǵı Nókis mámleketlik pedagogikalıq institutı mámleketimizdegi tuńǵısh joqarı oqıw orınlarınıń biri sıpatında respublikamızdıń bilimlendiriw hám xalıq xojalıǵınıń túrli tarawlarına joqarı potenciallı maman qánigelerdi tárbiyalap shıǵarmaqta.

90 jılǵa shamalas tariyxına iye esaplanǵan oqıw ornında búgingi kúnde 17 mıńǵa jaqın studentler tálim-tárbiya almaqta. Olarǵa 600 ge shamalas professor-oqıtıwshılar bilim bermekte. Sonıń menen birge, institutta házirgi waqıtta 560 tan aslam qánigeler hár qıylı bólimlerde óz xızmet wazıypaların shın kewilden atqarıp, miynet etpekte.

Mine, usınday úlken jámáátke iye bolǵan institutta juwmaqlanıw aldında turǵan 2023-jılda ayrıqsha belsendilik kórsetip, joqarı nátiyjelerge erisken pidayı insanlardı xoshametlew, olardıń miynetlerin múnásip bahalaw hám basqalarǵa úlgi etip kórsetiw maqsetinde sıylıqlaw máresimi bolıp ótti.

Ilajda institut rektorı wazıypasın waqıtsha atqarıwshısı Quvondiq Qodirov sózge shıǵıp, esik qaǵıp turǵan jańa 2024-jıl menen jıynalǵanlardı qutlıqlap, óziniń jaqsı tileklerin bildirdi. Juwmaqlanıp atırǵan 2023-jılda institutta júz bergen áhmiyetli waqıyalar, qolǵa kirgizilgen tabıslar haqqında ayta kelip, kelesi jılda ámelge asırılatuǵın jumıslarǵa toqtalıp ótti.

2023-jıl pedinstitut ushın ilimiy-pedagogikalıq baǵdarda joqarı nátiyjelerge tolı jıl boldı. Jıl dawamında 3 ilim doktorı (DSc) hám 27 filosofiya doktorı (PhD) dissertaciya jumısların tabıslı qorǵadı. Professor-oqıtıwshılar tárepinen «Scopus» hám «Web of Science» bazaları tárepinen indeksaciyalanǵan jurnallarda 71 ilimiy maqala baspadan shıǵarıldı.

Institutta ulıwma bahası 963 million sumlıq ilimiy-ámeliy joybar ámelge asırılmaqta. Jıl dawamında 9 xalıqaralıq hám 9 respublikalıq ilimiy-ámeliy konferenciya ótkerildi. Jáne bir ayta ketetuǵın jeri, instituttıń qábiletli, bilimli hám ziyrek jasları arasınan 15 student Ózbekstan Respublikası Prezidenti hám ataqlı mámleketlik stipendiyalar tańlawlarında jeńimpazlar qatarınan orın aldı.

Bilimlendiriwdiń sapası hám nátiyjeliligin ele de arttırıw maqsetinde dúnyanıń «TOP-1000» dizimindegi joqarı oqıw orınlarınan 14 sırt elli professor-oqıtıwshı hám qánigeler oqıw procesine shaqırıldı. Óz gezeginde, instituttıń 45 professor-oqıtıwshısı hám qánigesi «TOP-1000»lıqqa kiretuǵın sırt el joqarı oqıw orınları jáne ilimiy-izertlew oraylarında tájiriybe arttırıp, qánigeligin jetilistirip qayttı.

Jıl dawamında sırt ellerdiń abıraylı 6 joqarı oqıw ornı menen eki tárepleme birge islesiw boyınsha shártnamalar hám memorandumlar dúzildi.

Sonıń menen birge, institut studentleri xalıqaralıq hám respublikalıq pán olimpiadaları, tańlawlar, sport hám intellektual jarıslar, festival, konferenciya, forum hám simpoziumlarda joqarı orınlardı iyeledi. «Tumaris» xalıq ansambli aǵzaları hám qábiletli studentler xalıqaralıq tańlawlarda joqarı nátiyjelerge erisip, respublikamızda ótkerilgen hár qıylı bayram saltanatları, xalıq seyilleri hám tamashalarında ózleriniń sheberliklerin, talantın kórsetti.

Instituttıń student-jasları sport túrleri boyınsha Ózbekstan, Qaraqalpaqstan, Aziya hám Jáhán birinshiliklerinde úlken tabıslarǵa eristi.

Álbette, bunday nátiyjelerge erisiwde institutta jaratılıp atırǵan sharayatlar, itibar jáne qollap-quwatlawdıń áhmiyeti úlken.

Ilajda usınday joqarı nátiyjelerge erisken, xızmet wazıypaların shın hújdanı menen atqarıp kiyatırǵan professor-oqıtıwshılar, qánigeler hám student-jaslar túrli nominaciyalar boyınsha sıylıqlandı.

Sıylıqlaw máresimi «Tumaris» xalıq ansambli hám talantlı studentler atqarıwındaǵı bayram koncerti menen dawam etti.

Institutta jańa jıl aldınan bayram ilajları dawam etpekte.

NMPI baspasóz xızmeti.