Assalawma áleykum, áziz watanlaslar, húrmetli professor-oqıtıwshılar hám student-jaslar!

Hámmeńizdi kirip kiyatırǵan jańa 2024-jıl menen Ájiniyaz atındaǵı Nókis mámleketlik pedagogikalıq institutı rektoratı atınan shın júrekten qutlıqlaymız.

Jańa jıl bayramı juwmaqlanıp atırǵan jılda qolǵa kirgizilgen tabıslar, erisilgen nátiyjeler hám iyelengen tájiriybelerdi analizlep, kelesi jıl ushın úlken jobalardı belgilep alatuǵın – ulıwma aytqanda jańa úmitler hám maqsetlerge qaray baǵdarlaytuǵın ózgeshe bayram.

Mámleketimizdegi tuńǵısh joqarı oqıw orınlarınıń biri sıpatında respublikamızdıń bilimlendiriw hám xalıq xojalıǵınıń túrli tarawlarına joqarı potenciallı maman qánigelerdi tárbiyalap shıǵarıp atırǵan institutımız ushın 2023-jıl úlken tabıslar jılı boldı desek qátelespegen bolamız.

Ilim, bilimlendiriw, innovaciya, kórkem óner, mádeniyat, ádebiyat, sport hám basqa da tarawlarda professor-oqıtıwshılarımız, pedagog hám texnikalıq xızmetkerlerimiz, student-jaslarımız tárepinen joqarı nátiyjeler qolǵa kirgizildi.

Álbette, bulardıń barlıǵı mámleketimizde joqarı bilimlendiriw tarawına qaratılıp atırǵan itibar hám ǵamqorlıqlar, jaratılıp atırǵan sharayatlardıń nátiyjesi esaplanadı.

Kelesi 2024-jıl institutımız tariyxı ushın úlken áhmiyetke iye jıl bolıwı kútilmekte. Óytkeni, 2024-jılda institutımızdıń shólkemlestirilgenine 90 jıl, oqıw dárgayımızǵa atı qoyılǵan Ájiniyaz Qosıbay ulı babamızdıń tuwılǵanına 200 jıl toladı. Biz nesip etse bul sánelerdi joqarı shólkemleskenlik penen respublikalıq hám xalıqaralıq dárejede belgilewdi jobalastırıp atırmız.

Qádirli zamanlaslar!

Sizler menen Jańa Ózbekstan hám Jańa Qaraqalpaqstan ushın jetik kadrlar tayarlaw baǵdarındaǵı iygilikli maqsetlerimizdi birgelikte ámelge asırıw nesip ete bergey.

Kirip kiyatırǵan jańa jılda elimizge tınıshlıq, paraxatshılıq, dáryalarımızǵa mol suw, xalqımızǵa abadanlıq, hár birińizge bekkem densawlıq, shańaraqlarıńızǵa amanlıq, mol ırısqı-nesiybe, baxıt, dáwlet, jumıslarıńızǵa tabıslar hám joqarı shekler tilep qalamız.

Jańa jılıńız qutlı bolsın!

Quvondiq Qodirov,
Ájiniyaz atındaǵı Nókis mámleketlik pedagogikalıq institutı rektorı wazıypasın waqıtsha atqarıwshısı.